##Harivamsha Maha Puranam - Part 3 - Bhavishya Parva
Chapter 59  kAla engages PrahrAda
Itranslated by G. Schaufelberger schaufel @ wanadoo.fr
November 30, 2008##
Proof-read by  K S Rmachandran, ramachandran_ksr @ yahoo.ca.
If you find any errors compared to Chitrashala Press edn,
send corrections to A. Harindranath harindranath_a @ yahoo.com
----------------------------------------------------------------

athaikonaShaShTitamo.adhyAyaH
devAsurayuddhe kAlaprahrAdayoryuddham


vaishampAyana uvAcha

vR^iShaparvA tu daityendro vishvamadbhutadarshanam |
niShkumbhaM yodhayAmAsa lohitArkasamadyutim ||3-59-1
krodhamUrChitavaktrastu dhunvanparamakArmukam |
dhanuMShi prekShya shatrUNAM sArathiM tvarito.abravIt ||3-59-2
atraiva tAvattvaritaM naya me sArathe ratham |
ete devAshcha sahitA ghnanti naH samare balam ||3-59-3
etAnnihantumichChAmi samarashlAghino raNe |
etairhi dAnavAnIkaM kR^itachChidramidaM mahat ||3-59-4
tataH prajavitAshvena rathena rathinAM varaH |
arInabhyahanatkruddhaH sharajAlairmahAsuraH ||3-59-5
na sthAtuM devatAH shaktAH kiM punaryoddhumAhave |
vR^iShaparveShunirbhinnAH sarva evAbhidudruvuH ||3-59-6
tAnmR^ityuvashamApannAnvaivasvatavashaM gatAn |
samIkShya nihatA~nj~nAtInavatasthe mahAsuraH ||3-59-7
dR^iShTvA taM tatra niShkumbhaM sarve te tridashotttamAH |
sametya sahitAH sarve drutaM taM paryavArayan ||3-59-8
vyavasthitaM tu niShkumbhaM dR^iShTvA tridashasattamam |
babhUvurbalavanto vai tasyAstrabalatejasA ||3-59-9
vR^iShaparvA tu shailAbhaM niShkumbhaM samare sthitam |
mahendra iva dhArAbhiH sharavarShairavAkirat ||3-59-10
achintayitvA tu sharA~nchCharIre patitAnbahUn |
sthitashcha pramukhe shrImAnsasainyaH sa mahAbalaH ||3-59-11
saMprahasya mahAtejA vR^iShaparvANamAhave |
abhidudrAva vegena kampayanniva medinIm ||3-59-12
tasya tvAdhAvamAnasya dIpyamAnasya tejasA |
babhUva rUpaM durdharShaM dIptasyeva vibhAvasoH ||3-59-13
rathaM tyaktvA mahAtejAH sakrodhaH samapadyata |
vR^ikShamutpATayAmAsa mahAtAlaM mahochChrayam ||3-59-14
tatashchikShepa taM vR^ikShaM niShkumbho vR^iShaparvaNaH |
taM gR^ihItvA mahAvR^ikShaM pANinaikena dAnavaH ||3-59-15
vinadya sumahAnAdaM bhrAmayitvA cha vIryavAn |
sagajAnsagajArohAnsarathAnrathinastathA ||3-59-16
jaghAna dAnavastena shAkhinA tridashAMstadA |
tamantakamiva kruddhaM samare prANahAriNam ||3-59-17
vR^iShaparvANamAsAdya tridashA vipradudruvuH |
tamApatantaM sa~NkruddhaM tridashAnAM bhayAvahaM ||3-59-18
Alokya dhanvI niShkumbhashchukrodha cha nanAda cha |
sa tatra nishitairbANaistriMshadbhirmarmabhedibhiH |3-59-19
nirbibheda mahAvIryo niShkumbho dAnavAdhipam |
sharashaktibhirugrAbhirdaityAnAmadhipaM prabhum ||3-59-20
viddhaH samaramadhyastho rudhiraM prAsravadbahU |
udvignA muktakeshAste bhagnadarpAH parAjitAH ||3-59-21
shvasanto dudruvuH sarve bhayAdvai vR^iShaparvaNaH |
anyonyaM pramamanthuste trAsitA vR^iShaparvaNA ||3-59-22
pR^iShThavaktrAH susaMvignAH prekShamANA muhurmuhuH |
tyaktapraharaNAH sarve kR^itAste vR^iShaparvaNA ||3-59-23
sa~NgrAme yuddhashauNDena tadA niShkumbhasainikAH |
tatraiva tu mahAvIryaH prahlAdaH kAlamAhave ||3-59-24
yodhayAmAsa raktAkSho hiraNyakashipoH sutaH |
tasya dAnavavIrasya yuddhakAle jayakriyAH ||3-59-25
chakAra tvarayA yukto bhArgavo vijayAvahAH |
hutAshanaM tarpayato brAhmaNAMshcha namasyataH ||3-59-26
Ajyagandhaprativaho mArutaH surabhirvavau |
srajashcha vividhAshchitrA jayArthamabhimantritAH ||3-59-27
prahlAdasya shubhe mUrdhanyAbabandhoshanAH svayam |
kAlena saha sa~NgrAme prayuddhasya mahAtmanaH ||3-59-28
prahlAdasyAtivIryasya shAntiM chakre sa bhArgavaH |
dasha shiShyasahasrANi bhArgavasya mahAtmanaH ||3-59-29
yAni dAnavavIrANAM jepuH shAntimanuttamAm |
atharvANamatho divyaM brahmasaMstavachoditam ||3-59-30
raNapraveshasadR^ishaM karma vaijayikaM kR^itam |
tataH sarvAstraviduShaH samareShvanivartinaH ||3-59-31
vidyayA tapasA yuktAH kR^itasvastyayanakriyAH |
dhanuhastAH kavachino vegenAplutya dAnavAH |
balimabhyarchya rAjAnaM prahrAdaM paryavArayan ||3-59-32|
AsthAya paramaM divyaM rathaM pararathArujam |
nAnApraharaNAkIrNaM savajramiva parvatam ||3-59-33
tadbabhUva muhUrtena kShveDitAsphoTitAkulam |
meroH shikharamAkIrNaM dyaurivAmbudharAgam ||3-59-34
srajaH padmapalAshAnAmAmuchya suvibhUShitAH |
bAndhavAnsaMparityajya nipatanti raNapriyAH ||3-59-35
mahAyudhadharaH shrImA~nchChubhacharmadharaH prabhuH |
shirastrANatanutrANi dhanvI paramadurjayaH ||3-59-36
siMhashArdUladarpANAM gadatAM ki~NkiNIkinAm |
tasya daityasahasrANi prayAntyagre mahAraNe ||3-59-37
sainyapakShahatAstasya rathAH paramadurjayAH |
saptatirvai sahasrANi gajAstAvanta eva cha ||3-59-38
madhye vyUhodarasthastu kAlanemirmahAsuraH |
dhanurvisphArayAmAsa nanAda prajahAsa cha ||3-59-39
tasmi~nchChatasahasrANi puro yAnti mahAdyuteH |
dAnavAnAM balavatAM shakrapratimatejasAm ||3-59-40
sa samaM vartamAnastu pakShAbhyAM vistR^ito mahAn |
abhavaddAnavavyUho durbhedyaH sarvadaivataiH ||3-59-41
ShaShTI rathasahasrANi dAnavAnAM dhanurbhR^itAm |
nAnApraharaNAnAM cha parimANaM na vidyate ||3-59-42
gadAparighanistriMshaiH shUlamudgarapaTTishaiH |
pragR^ihItairvyarAjanta dAnavAH parvatopamAH ||3-59-43
garjanto ninadantashcha vikroshantaH punaH punaH |
ayudhyanta mahAvIryAH samareShvanivartinaH ||3-59-44
tatra tUryasahasrANi bherisha~NkharavANi cha |
hayAnAM cha gajAnAM cha garjatAmativeginAm ||3-59-45
dundubhINAM cha nirghoShaH parjanyaninadopamaH |
shushruve sha~Nkhashabdashcha paTahAnAM cha niHsvanaH ||3-59-46 
tena sha~NkhaninAdena bherItUryaraveNa cha |
nirghoSheNa rathAnAM cha kroshatIva  nabhastalam ||3-59-47
sAgarapratimaughena balena mahatA vR^itaH |
prahlAdo.ayudhyata raNe kAlAntakayamopamaH ||3-59-48
tasya nAdena raudreNa ghoreNApratimaujasaH |
vineduH sarvabhUtAni trailokyanikR^itaiH svanaiH ||3-59-49
antarikShAtparaM tyaktvA vAyushcha paruSho vavau |
vamantyaH pAvakaM ghoraM shivAshchaiva vavAsire ||3-59-50
prahlAdastu mahAvIryaH prahasanyuddhadurmadaH |
uvAcha vachanaM shrImAMstatkAlakShamamuttamam ||3-59-51
adyAhaM darshayiShyAmi svabahubalamUrjitam |
adya madbANanihatAndevAndrakShyatha saMyuge ||3-59-52
bAndhavA nihatA yeShAM tridashairiha saMyuge |
adya nirvartayiShyanti shatrumAMsAni dAnavAH ||3-59-53
imamadya samudbhUtaM reNuM samaramUrdhani |
ahaM tu shamayiShyAmi shatrushoNitavisravaiH ||3-59-54
timiraughahatArkaM tu sainyareNvaruNIkR^itam |
AkAshaM saMpatiShyanti khadyotA iva me sharAH ||3-59-55
dR^iShTA saMparimodadhvaM devebhyastyajyatAM bhayam |
adyAhaM nihaniShyAmi kAlendraM dhanuShA raNe ||3-59-56
toShayiShyAmi rAjAnaM baliM balavatAM raNe |
tridashAnsagaNAnhatvA raNe chAntakamantikAt ||3-59-57
akShayAH santi me tUNAH sharAshchAshIviShopamAH |
sthAtuM me purataH shaktAH ke raNe jIvitepsavaH ||3-59-58
hatvA ripugaNAMstuShTiranurAgashcha rAjasu |
hatasya tridive vAso nAsti yuddhasamA gatiH ||3-59-59
tadbhayaM pR^iShThataH kR^itvA raNe dAnavasattamaH |
nihatyemAnarIntsarvAnmodadhvaM nandane vane ||3-59-60
evamuktvA mahatsainyaM prahlAdo dAnavottamAH |
kAlasainyaM mahAraudraM tarasAmardatAsuraH ||3-59-61
sarvAstravidvAnvIrashcha nityaM chApyaparAjitaH |
yuddhe hyabhimukhe nityaM svabAhubaladarpitaH ||3-59-62
ShaShTiM rathasahasrANi vividhAyudhadhAriNAm |
prahlAdasyAtivIryasya te tasya tanayA nijAH ||3-59-63
taistu kratushatairiShTaM vipulairAptadakShiNaiH |
kShAntA dharmaparA nityaM satyavrataparAyaNAH ||3-59-64
dAtAraH priyavaktAro vaktAraH shAstravastuShu |
svadAraniratA dAntA brahmaNyAH satyasa~NgarAH ||3-59-65
yaShTAraH kratubhirnityaM nityaM chAdhyayane ratAH |
iShvastrakushalAH sarve bahusho dR^iDhavikramAH ||3-59-66
mattavAraNavikrAntAH shatrusainyapramardakAH |
dArayantaH padAkShepaiH sughorAnvAtarechakAn ||3-59-67
yuddhotsukadhiyA nityaM krodhara~njitalochanAH |
saMdaShTauShThapuTA daityA vinedurbhImavikramAH |
kShveDitAsphoTitaravairanyonyaM samaharShayan ||3-59-68
veNusha~Nkharavaishchaiva siMhanAdaishcha puShkalaiH |
AplutyAplutya sahasA raNe vavruranekashaH ||3-59-69
tAlamAtrANi chApAni vikR^iShya sumahAbalAH |
amR^iShyamAnAH sahasA dAnavAshchApapANayaH ||3-59-70
surAsurairapyajitaM yodhayanti raNe.antakaM |
prataptahemAbharaNAH sarve te shvetavAsasaH ||3-59-71
dAnavA mAninaH sarve sarve svargAbhikA~NkShiNaH |
sarve jayaiShiNo vIrAH sarve shatruvadhodyatAH ||3-59-72
shushubhe sA chamUrdIptA patAkAdhvajamAlinI |
gajAshvarathasaMbAdhA svargamArgAbhikA~NkShiNI ||3-59-73
tataH kAlaH suniryAto bhImo bhImaparAkramaH |
ninadansumahAkAyo vyAdhibhirbahubhirvR^itaH ||3-59-74
dadarsha mahatIM senAM dAnavAnAM balIyasAm |
abhisa~njAtadarpANAM kAlaM samabhigarjatAm ||3-59-75
tadAyAntaM tadAnIkaM dAnavAnAM tarasvinAm |
pratilomaM chakArAshu vyAdhibhiH sahito.antakaH ||3-59-76
pravishya dhvajinIM chaiShAM pAtayAmAsa dAnavAn |
kAlo rudhiraraktAkShaH svenAnIkena saMvR^itaH ||3-59-77
prahrAdabalamatyugraM prahrAdaM cha mahAbalam |
AjaghAna raNe kAlo daNDamudgarapaTTishaiH ||3-59-78
sharashaktyR^iShTikhaDgAMshcha shUlAni musalAni cha |
gadAshcha parighaishchaiva vichitrAshcha parashvadhAH ||3-59-79
dhanuMShi cha vichitrANi shatagnIshcha sthirAyasIH |
pAtyante vyAdhibhiryuddhe dAnavAnAM chamUmukhe ||3-59-80
bahavo vyAdhayo yuddhe bahUnasurapu~NgavAn |
vyAdhInapi cha daityaughA nijaghnurbahavo bahUn ||3-59-81
shUlaiH pramathitAH kechitkechichChannAH parashvadhaiH |
parighairAhatAH kechitkechichcha paramAyudhaiH |
kechiddvidhA kR^itAH khaDgaiH sphurantaH patitA bhuvi ||3-59-82
vyAdhayo dAnavaireva nAnAshastrairvidAritAH |
te chApi vyAdhibhiH sarve vividhairAyudhottamaiH ||3-59-83
khaDgaishcha musalaistIkShNaiH prAsatomaramudgaraiH |
bhinnAshcha dAnavAH sarve nikR^ittAshcha parashvadhaiH ||3-59-84
mudgaraiH paTTishaishchaiva vyAdhibhishcha mahAbalaiH |
kR^itvA shastrairanekaishcha muShTibhishcha hatA bhR^isham ||3-59-85
vemuH shoNitamanyonyaM viShTabdhadashanekShaNaH |
ArtasvaraM cha nadatAM siMhanAdaM cha garjatAm ||3-59-86
babhUva tumulaH shabdaH sa~NgrAme lomaharShane |
muShTibhishchottamA~NgAni talairgAtrANi chAsakR^it ||3-59-87
sAditAni mahIM jagmustiShThatAmeva saMyuge |
asraphenA dhvajAvartA chChinnabAhumahoragA ||3-59-88
shUlashaktimahAmatsyA chApagrAhasamAkulA |
ratheShupalasaMbandhA dhvajadrumalatAvR^itA ||3-59-89
sashabdaghoravistArA lohitodAbhavannadI |
svadhanuHshakradhanuShau kA~nchanA~Ngadavidyutau ||3-59-90
tau daityakAlajaladau sharadhArAM vyamu~nchatAm |
tau mahAmeghasa~NkAshau rathanAgagatau tadA ||3-59-91
babhUvaturabhikruddhau sAmbugarbhAvivAmbudau |
taptakA~nchanasannAhau divyahAravibhUShitau ||3-59-92
tau virejaturAyattau sUryavaishvAnaropamau |
tau mahAbalasa~NkAshAvanyonyasya chamUmukhe ||3-59-93
shakrAshanisamasparshairbANairjaghnaturAhave |
parasparaM samAsAdya tayoryudhi durAsadam ||3-59-94
nAshaMsanta tadA yodhA jIvitAnyapi saMyuge |
sharairvibhinnasarvA~NgA yudhi prakShINabAndhavAH |
nipeturyodhamukhyAstu rudhirokShitavakShasaH ||3-59-95
patitairnishpatadbhishcha pAtyamAnaishcha saMyuge |
babhUva bhUH samAkIrNA yodhairudgatajIvitaiH ||3-59-96
agR^ihNanta sharAnghorAMste cha sandadhatostayoH |
antaraM dadR^ishe kashchitprayatnAdapi saMyuge ||3-59-97
laghutvAchcha mahAbahU yuddhashauNDau mahAbalau |
maNDalIbhUtadhanuShau sakR^ideva babhUvatuH ||3-59-98
prahrAdasya cha bANaughairdudrAvAntakavAhinI |
uhyamAnA balavatA vAyunevAbhramaNDalam ||3-59-99
hatadarpaM tu vij~nAya prahrAdaH kAlamAhave |
apayAtaM cha samare dviShantaM saMpratarkya tam ||3-59-100
matvA vashagataM chaiva prahrAdo yuddhadurmadaH |
tatraivAnyAM chamUM bhUyaH saMmamarda mahAsuraH ||3-59-101
kAlaprahrAdayoryuddhamabhavadyAdR^ishaM purA |
tAdR^ishaM sarvalokeShu na bhUtaM na bhaviShyati ||3-59-102
evamadbhutavIryaujA mahAraNakR^itavraNaH |
prahrAdastvatha vR^iddho.atra kAlastvapasR^ito raNAt ||3-59-103

iti shrImahAbhArate khileShu harivaMshe bhaviShyaparvaNi vAmane
devAsurayuddhe kAlaprahrAdayuddhe ekonaShaShTitamo.adhyAyaH