##Harivamsha Maha Puranam - Part 3 - Bhavishya Parva
Chapter 60 Battle between Anuhrada and Kubera
Itranslated by G. Schaufelberger schaufel @ wanadoo.fr
Decemberr 2nd, 2008##
Proof-read by  K S Rmachandran, ramachandran_ksr @ yahoo.ca.
If you find any errors compared to Chitrashala Press edn,
send corrections to A. Harindranath harindranath_a @ yahoo.com
----------------------------------------------------------------

atha ShaShTitamo.adhyAyaH
devAsurayuddhe kuberAnuhrAdayoryuddham


vaishampAyana uvAcha

dhanAdhyakShamanuhrAdaH prahrAdasyAnujo balI |
sasainyaM yodhayAmAsa kShobhayanyakShavAhinIM ||3-60-1
mahatA cha balaughena tvanuhrAdo.asurottamaH |
ardayAmAsa sa~Nkruddho dhanAdhyakShaM pratApavAn ||3-60-2
amR^iShyamANAMstridashAnAhavasthAnudAyudhAn |
chakAra kadanaM ghoraM dhanuShpANirmahAsuraH ||3-60-3
Avarta iva saMjaj~ne balasya mahato mahAn |
kShubhitasyAprameyasya sAgarasyeva saMplavaH ||3-60-4
tridAshAnAM sharIraistu dAnavAnAM cha medinI |
babhUva nichitA ghoraiH parvatairiva saMplave ||3-60-5
merupR^iShThaM tu raktena ra~njitaM saMprakAshate |
sarvato mAdhave mAsi puShpitairiva kiMshukaH ||3-60-6
hatairghorairgajairashvaiH prAvartata mahAnadI |
shoNitaughA mahAghorA yamarAShTravivardhinI ||3-60-7
shakR^inmedomahApa~NkA saMprakIrNAntrashaivalA |
ChinnakAyashiromInA a~NgAvayavashADvalA ||3-60-8
gR^idhrahaMsasamAkIrNA kekisArasanAditA |
vasAphenasamAkIrNA protkR^iShTastanitasvarA ||3-60-9
tAM kApuruShadustArAM yuddhabhUmau mahAnadIM |
nadiMivAtapApAye haMsasa~NghopashobhitAm ||3-60-10
tridashA dAnavAshchaiva teruste dustarAM nadIm |
yathA padmarajodhvastAM nalinIM gajayUthapAH ||3-60-11
tataH sR^ijantaM bANaughANanuhrAdaM rathe sthitam |
dadarsha tarasA devA nighnantaM yakShavAhinIm ||3-60-12
kruddhastato daityabalaM sUdayAmAsa vittapaH |
vikShipanniva khe vAyurmahAbhrapaTalaM balAt ||3-60-13
samIkShya tumulaM yuddhamanuhrAdashcha vIryavAn |
rathenAdityavarNena kuberamabhidudruve ||3-60-14
sa dhanurdhanvinAM shreShTho vikR^iShya raNamUrdhani |
utsasarja shitAnbANAnvitteshasya mahAtmanaH ||3-60-15
kuberaM prApya te bANA nirbhidya susamAhitAH |
aparAnpR^iShThato jaghnurvyAsaktAnyakSharAkShasAn ||3-60-16
devaH sharairabhihato nishitairjvalanopamaiH |
anuhrAdaM pratyudiyAtsa~NkruddhaH paramAhave ||3-60-17
tato vaishravaNo rAjA kruddho yakShagaNaiH saha |
vavarSha sharavarShANi dAnavaM prati vIryavAn ||3-60-18
tadyathA shAradaM varShaM govR^iShaH shIghramAgatam |
apArayanvArayituM pratigR^ihNannimIlitaH ||3-60-19
evameva kuberasya sharavarShaM mahAsuraH |
nimIlitAkShaH sahasA daityaH sahati dAruNam ||3-60-20
roShitaH sharavarSheNa dhanadena mahAsuraH |
indraketupratIkAshamabhIto.apashyata drumam ||3-60-21
pravR^iddhashAkhAviTapaM taruNA~Nkurapallavam |
utpATya kupito daityastaruM phalasamanvitam ||3-60-22
nijaghAna hayA~nshreShThAnkuberasya mahAtmanaH |
tasya karma mahAghoraM dR^iShTvA sarve mahAsurAH ||3-60-23
siMhanAdaM nadanti sma anuhrAdapraharShitAH |
tayostu tumulaM yuddhaM saMjaj~ne devadaityayoH ||3-60-24
tatastau krodharaktAkShAvanyonyavadhakA~NkShiNau |
anyonyaM vividhaiH shastrairghorairjaghnaturAhave ||3-60-25
tridashA dAnavAntsarve mathitvA prANadaMstadA |
dAnavaistridashAshchApi kruddhairbhuvi nipAtitAH ||3-60-26
dAnavAstvathA sa~NkruddhAstridashAnnishitaiH sharaiH |
vivyadhurvajrasa~NkAshaiH ka~NkapatrairajihmagaiH ||3-60-27
vidAryamANA daityaughaistridashAstu mahAbalAH |
amarShitatarAshchakruryuddhakarmANyabhItavat ||3-60-28
te gadAbhiH subhImAbhiH paTTishaiH shUlamudgaraiH |
parighaishcha sutIkShNAgrairdAnavAH pIDitAH sharaiH ||3-60-29
sharanirbhinnagAtraAshcha khaDgavichChinnavakShasaH |
jagR^ihuste shilAshchaiva drumAMshchAsurasattamAH ||3-60-30
te bhImasa~NgA ditijA nardamAnAH punaH punaH |
mamanthustridashAnvIryA~nChatasho.atha sahasrashaH ||3-60-31
tatastu tumulaM yuddhaM teShAM samabhivartata |
shilAbhirvipulAbhishcha shatashashchaiva pAdapaiH ||3-60-32
parighaiH paTTishairbhallairbhiNDipAlaiH parashvadhaiH |
kechinnivR^ittashirasaH kechichcha vidalIkR^itAH ||3-60-33
kechidvinihatA bhUmau rudhirArdrAH surAsurAH |
kechidraNAjirAnnaShTAH parasparavadhArditAH ||3-60-34
vibhinnahR^idayAH kechichChinnapAdAshcha sherate |
vidAritAstrishUlaishcha kechittatra gatAsavaH ||3-60-35
tatsubhImaM mahadyuddhaM devadAnavasa~NkulaM |
babhUva tumulaM yuddhaM shilApAdapasa~NkulaM ||3-60-36
dhanurjyAtantrimadhuraM hikkAtAlasamanvitam |
ArtastanitaghoShADhyaM yuddhaM gAndharvamAbabhau ||3-60-37
kuberaH sa dhanuShpANirdAnavAnraNamUrdhani |
disho vidrAvayAmAsa sa~NkruddhaH sharavR^iShTibhiH ||3-60-38
kubereNArditaM sainyaM vidrutaM prekShya dAnavaH |
abhyadravadanuhrAdaH pragR^ihya mahAtIM shilAm ||3-60-39
kroddhAddviguNaraktAkShaH pitR^itulyaparAkramaH |
shilAM tAM pAtayAmAsa kuberasya rathottame ||3-60-40
ApatantIM shilAM dR^iShTvA gadApANirdhanAdhipaH |
rathAdAplutya vegena vasudhAyAM vyatiShThata ||3-60-41
sachakrakUbarahayaM sadhvajaM sasharAsanam |
bha~NktvA rathottamaM tasya nipapAta shilA bhuvi ||3-60-42
vimathya tu kuberasya prahrAdasyAnujo ratham |
shUrANAM kadanaM chakre saskandhaviTapairdrumaiH ||3-60-43
nirbhinnashiraso bhagnAstridashAH shoNitokShitAH |
drumapravyathitA~NgAshcha nipeturdharaNItale||3-60-44
vidrAvya vipulaM sainyamanuhrAdo mahAsuraH |
girishR^i~NgaM gR^ihItvA tu kuberamabhidudruve ||3-60-45
tamapatantaM dhanado gadAmudyamya vIryavAn |
vinaditvA.a.ahvayAmAsa dAnavendraM mahAbalam ||3-60-46
tasya  daitasya sa~Nkruddho gadAM tAM bahukaNTakAm |
nyapAtayata vttesho dAnavasyorasi prabho ||3-60-47
daityaH sakrodhatAmrAkShastaM prahAramachintayat |
vitteshasyopari tadA girishR^i~NgamapAtayat ||3-60-48
sa vihvalitasarvA~Ngo girishR^i~NgeNa tADitaH |
papAta sahasA bhUmau vishIrNa iva parvataH ||3-60-49
vitteshaM vihvalaM dR^iShTvA sarve te yakSharAkShasAH |
parivArya mahAtmAnaM rarakShurbhImavikramAH ||3-60-50
muhUrtaM vihvalo bhUtvA punarvishravasaH sutaH |
upatasthe cha sahasA dhanadaH krodhamUrchChitaH ||3-60-51
sa nanAda mahAnAdaM trailokyamabhinAdayan |
janayanniva nirghoShaM vidhamanniva parvatAn ||3-60-52
tamavadhyaM tu vij~nAya nihantuM punarutthitam |
prekShya pi~NgAkShamAyAntaM dAnavA vipradudruvuH ||3-60-53
tAMstu vidravato dR^iShTvAnuhrAdo hyasuro.abravIt |
kAlanemiM dAnavaM cha vIryadarpasamanvitam ||3-60-54
AtmAnaM chaiva vIryaM cha vismR^ityAbhijanaM tathA |
kva gachChatha bhayatrastAH prAkR^itA iva dAnavAH ||3-60-55
nivartadhvaM mahAvIryAH kiM prANAnparirakShatha |
nAlaM yuddhAya yakSho.ayaM mahatIyaM vibhIShikA ||3-60-56 
etAM vibhIShikAmadya dAnavAnAM samutthitAm |
vikramya vidhamiShyAmi nivartadhvaM mahAsurAH ||3-60-57
te.asurAH sannivR^ittAshcha samadA iva ku~njarAH |
nijaghnuH paramakruddhA devasainyaM mahAsurAH ||3-60-58
kShINapraharaNAH kechinmahAmeghanibhasvanAH |
darpotkaTA bhujaireva saMprahAraM prachakrire ||3-60-59
prAMshubhishchaiva kAShThaishcha shilAbhishcha mahAbalaAH |
bAhubhishcha tathAnyonyamAkShipanti sma vegitAH ||3-60-60
muShTibhishcha talaishchaiva nakhapAtairmahAbalAH |
pAdapaishcha mahAshAkhairayudhyanta raNAjire ||3-60-61
anuhrAdastu sa~Nkruddho devatAnAM mahAchamUm |
mamantha paramAyatto vanAnyagnirivotthitaH ||3-60-62
rudhirArdrAstu bahavaH sherate yodhasattamAH |
vikR^itAH patitA bhUmau tAmrapushpA iva drumAH ||3-60-63
anuhrAdashcha vikrAnto devAMstvAshIviShopamAn |
yudhyamAnasya samare vyasR^ijannishitA~nCharAn ||3-60-64
dhanAdhipena viddhasya anuhrAdasya saMyuge |
a~NgAramishrAH kruddhasya mukhAnnishcherurarchiShaH ||3-60-65
atha bANasahasreNa vitteshaM dAnavottamaH |
vivyAdha sa sharaiH kruddho daNDapANirivAntakaH ||3-60-66
kuberastu sharairbhinnaH samantAtkShatajokShitaH |
rudhiraM parisusrAva giriH prasravaNairiva ||3-60-67
labdhvA sa tu punaH saMj~nAM roSharaktekShaNaH suraH |
gadAmatha samAsAdya bhImAM bhImaparAkramaH |
chikShepa daityamuddishya balAtkrodhena mUrChitaH ||3-60-68
aprAptAmantare so.atha tAM gadAM gadayAsuraH |
babha~nja vinadankruddhastadAshcharyamabhUttadA ||3-60-69
pragR^ihya tu gadAM bhUyo hyabhidudrAva dAnavam |
tamApatantaM dR^iShTvaiva anuhrAdo mahAbalaH ||3-60-70
girishR^i~NgamivotpATya kailAsAchalasannibham |
dhanAdhipaM pradudrAva vyAditAsya ivAntakaH ||3-60-71
tamantakamivAyAntamajeyaM sakalaiH sharaiH |
grasantamiva taM daityaM trailokyamakhilaM ruShA ||3-60-72
tamAlokya tathA bhUtaM dhanAdhyakSho raNam bhayAt |
apahAya yayau tatra yatra shakraH surAdhipaH ||3-60-73
tasya chApi mahatkarma dR^iShTvA vittapatistadA |
jagAma bhayasaMtrasto yatra devaH shachIpatiH ||3-60-74

iti shrImahAbhArate khileShu harivaMshe bhaviShyaparvaNi 
vAmanaprAdurbhAve anuhrAdakuberayuddhavarNane
ShaShTitamo.adhyAyaH