##Harivamsha Maha Puranam - Part 3 - Bhavishya Parva
Chapter 61  Viprachitti takes on Varuna
Itranslated by G. Schaufelberger schaufel @ wanadoo.fr
Decemberr 2nd, 2008##
Proof-read by  K S Rmachandran, ramachandran_ksr @ yahoo.ca.
If you find any errors compared to Chitrashala Press edn,
send corrections to A. Harindranath harindranath_a @ yahoo.com
----------------------------------------------------------------
athaikaShaShTitamo.adhyAyaH
devAsurayuddhe viprachittivaruNayoryuddham 


vaishampAyana uvAcha

viprachittistu varuNaM daityAnAmAdiravyayam |
jaghAneShugaNaiH kruddho dIptairiva mahoragaH ||3-61-1
sa dahyamAno daityena dIptaH sharagabhastibhiH |
nAbhyajAnata kartavyaM sa~NgrAme sa jaleshvaraH ||3-61-2
sarvalokeshvarasyeva parameShThI prajApatiH |
na shaknotyagrataH sthAtuM viprachitterjalAdhipaH ||3-61-3
vajro nAma mahAvyUho nirbhayaH sarvatomukhaH |
taM vyUhya pratyayudhyanta dAnavA devavAhinIM ||3-61-4
vahnijvAlAsamaM tatra ravimaNDalasannibham |
mukhamAbhAti daityasya viprachittermahAtmanaH ||3-61-5
varuNastu mahAtejA viprachittiM mahAsuram |
pradahanniva tejobhirjigIShuH pratyavaikShata ||3-61-6
sragdAmamAlAbharaNaH keyUrA~NgadabhUShaNaH |
jagrAha parighaM daityaH kailAsashikharopamam ||3-61-7
pinaddhaM kA~nchanaiH paTTairhemamAlinamAyasam |
yamadaNDopamaM ghoraM daityAnAM bhayanAshanam ||3-61-8
bhramayAmAsa sa~Nkruddho mahAshakradhvajopamam |
vinanAda vivR^ittAsyo viprachittirmahAsuraH ||3-61-9
sa kaNThasthena niShkeNa bhujasthairapi chA~NgadaiH |
kuNDalAbhyAM vichitrAbhyAM bhrAjate kA~nchanasrajA ||3-61-10
dAnavo bhUShaNairbhAti parigheNAyasena cha |
yathendradhanuShA meghaH savidyutstanayitnumAn ||3-61-11
prasphuratparighAstreNa vAtaskandhAnmahAsvanaH |
jajvAla cha sadhUmArchiH sA~NkarShaNa ivAnalaH ||3-61-12
vidhyAdharagaNaiH sArdhaM gandharvanagarairapi |
saha chaivAmarAvatyA siddhalokaistathA saha ||3-61-13
grahanakShatrarachitaM sArkachandravibhUShitam |
daityendraparighoddhUtaM bhramatIva nabhastalam ||3-61-14
durAsadaH susaMjaj~ne parighAbharaNakShamaH |
surendhano.asurendrAgniryugAntAgnirivotthitaH ||3-61-15
tridashA varuNashchaiva na shekuH spandituM bhayAt |
tatrAsInnirbhayastvekaH kaushiko vAsavaH prabhuH |
bhAskarapratimaM ghoraM parighaM raudradarshanam ||3-61-16
pAtayAmAsa senAyAM jaleshasya sa dAnavaH |
patatA tena sa~NgrAme jaleshasya mahAtmanaH ||3-61-17
bhUtAnAM shatasAhasraM parighena samAhatam |
teShAM gAtrANi chAsAdya vyashIryanta sahasrashaH ||3-61-18
vishIryamANaM vibabhAvulkAshatamivAmbare |
bhUyashchainaM tadA.a.abhrAmya varuNAya nyapAtayat ||3-61-19
pAtyamAne tadA tasmi~nCharIre vAruNe tadA |
sa bhinnaH parigho ghoro devagAtre vyashIryata ||3-61-20
shIryamANasya chUrNAni khadyotA iva chAmbare |
sa tu tena prahAreNa na chachAla jalAdhipaH ||3-61-21
parigheNa hataH sa~Nkhye yathA vajrahato.achalaH |
svasainyeShvapi bhagneShu bhinnadeheShu chAhave ||3-61-22
muhUrtamabhavatkShobhyamapAMpatiramarShaNaH |
so.amarShaM cha samApanno varuNo.amitavikramaH ||3-61-23
sarvasaMhAramakarotsvapakShasyArimardanaH |
sa sAgaraishchaturbhishcha vR^ito dIptaishcha pannagaiH ||3-61-24
sha~NkhamuktAmaNichito bibhrattoyamayaM vapuH |
pANDuroddhUtavasano nAnAratnavibhUShitaH ||3-61-25
varuNaH pAshadhR^ikChrImAnkUrmamInasamAkulaH |
varuNastu tadA kruddhastAnnirIkShya svasainikAn ||3-61-26
uvAcha dR^iShTvA yudhyadhvaM dAnavAnAM jighAMsayA |
ahamenaM haniShyAmi bhayaM muktvA tu yudhyata ||3-61-27
tataste pannagAH sarve mahArNavajalAshrayAH |
jaghnurdaityAnraNamukhe nadanto jayagR^iddhinaH ||3-61-28
te tu nAlIkanArAchairgadAbhirmusalairtathA |
abhyaghnandAnavAnhR^iShTA muditA varuNAnugAH ||3-61-29
viprachittistu sa~Nkruddho mahAbalaparAkramaH |
pannagAnAM sharIrANi vyadhamadyuddhadurmadaH ||3-61-30
garuDenApi chAstreNa pannagAndAnavotttamaH |
samare ghAtayAmAsa garuDaH pannagAshanaiH ||3-61-31
sa sharaiH sUryasa~NkAshaiH shAtakumbhavibhUShitaiH |
pannagAnsamare vIraH pramamAtha sudurjayAn ||3-61-32
samare bhinnagAtrAste pannagAH sharapIDitAH |
peturmathitasarvA~NgA gajA iva mahAgajaiH ||3-61-33
tapantaM tamivAdityaM dIptairbANagabhastibhiH |
abhyadhAvata sa~NkruddhaH samare varuNaH prabhuH ||3-61-34
tatastu dAnavAstatra bhinnadehAH sahasrashaH |
vyathitA vidravanti sma disho dasha vichetasaH ||3-61-35
indrasyArthe parAkramya varuNastyaktajIvitaH |
vinardamano yuyudhe samare pAshabhR^idvaraH ||3-61-36
varuNaH pannagAshchaiva muShTibhiH samarotkaTAH |
abhyavartanta samare viprachittiM mahAsuram ||3-61-37
tato.astraishcha shilAbhishcha prAharatsa balotkaTaH |
vyapohata mahAtejA viprachittirmahAsuraH ||3-61-38
tataH pAvakasa~NkAshaiH sa muktaiH shIghragAmibhiH |
varuNasya mahAvegAnbibheda samare hayAn ||3-61-39
karmaNA tena mahatA viprachittermahAtmanaH |
agnerAjyAhutasyeva tejaH samabhivardhata ||3-61-40
sa sharaiH sUryasa~NkAshaiH sumuktaiH shIghragAmibhiH |
vAruNIM tAM mahAsenAM nirmamantha mahAbalaH ||3-61-41
kShiNAstrAM sAyakAkrAntAM sharajalena mohitAm |
shUlashaktyR^iShTibhinnAM cha chakAra rudhirokShitAm ||3-61-42
sa sharairvahnisa~NkAshaiH sumuktairnataparvabhiH |
varuNasya mahAvegAnbibheda samare hayAn ||3-61-43
abhidruto.atha daityena sasainyaH salilAdhipaH |
mahendraM sharaNaM prApto viprachitterbhayArditaH ||3-61-44

iti shrImahAbhArate khileShu harivaMshe bhaviShyaparvaNi 
vAmane viprachittiyuddhe ekaShaShTitamo.adhyAyaH