##Harivamsha Maha Puranam - Part 3 - Bhavishya Parva
Chapter 62  Hymn to Agni
Itranslated by G. Schaufelberger schaufel @ wanadoo.fr
December 3rd, 2008##
Proof-read by  K S Rmachandran, ramachandran_ksr @ yahoo.ca.
If you find any errors compared to Chitrashala Press edn,
send corrections to A. Harindranath harindranath_a @ yahoo.com
----------------------------------------------------------------

atha dviShaShTitamo.adhyAyaH
bR^ihaspatikR^ito.agnistavaH


vaishampAyana uvAcha

parAjayaM tu devAnAM dR^iShTvAgnirdevasattamaH |
chakAra buddhiM daityAnAM vadhe brahmarshibhiH stutaH ||3-62-1
svayaMprabhAyAH shANDilyA yaH putro havyavAhanaH |
hiraNyaretAH pi~NgAkSho devahUto hutAshanaH ||3-62-2
rohito lohitagrIvo hartA dAtA haviH kaviH |
pAvako vishvabhugdevaH sarvadevAnanaH prabhuH ||3-62-3
subrahmAtmA suvarchaskaH sahasrArchirvibhAvasuH |
kR^iShNavartmA chitrabhAnurdevAnAmapi devarAT ||3-62-4
lokasAkShI dvijahutaH sadarchiShmAnvaShaTkR^itaH |
havyabhakShaH shamIgarbhasvayoniH sarvakarmakR^it ||3-62-5
pAvanaH sarvabhUtAnAM tridashAnAM taponidhiH |
shamanaH sarvapApAnAM lelihAnastapomayaH ||3-62-6
pradakShiNAvartashikhaH shuchiromA makhAkR^itiH |
havyabhugbhUtabhavyesho yaj~nabhAgaharo hariH ||3-62-7
somapaH sumahAtejA bhUteshaH sumahAtapAH |
adhR^iShyaH pAvako bhUtirbhUtAtmA vai svadhAdhipaH ||3-62-8
svAhApatiH sAmagItaH somapUtAshano.adridhR^ik |
devadevo mahAkrodho rudrAtmA brahmasaMbhavaH ||3-62-9
lohitAshvaM vAyuchakraM rathamAsthAya bhUtadhR^ik |
dhUmaketurdhUmashikho nIlavAsAH surottamaH ||3-62-10
udyamya divamAgneyaM shastraM devo raNe mahAn |
dAnavAnAM sahasrANi prayutAnyarbudAni cha  ||3-62-11
dadAha bhagavAnvahniH sa~NkruddhaH pralaye yathA |
prANo yaH sarvabhUtAnAM dehe tiShThati pa~nchadhA ||3-62-12
yantA yashcha hutAshashcha sakhA cha prabhurIshvaraH |
prabha~njano yo lokAnAM yugAnte sarvanAshanaH ||3-62-13
saptasvaragatA yasya yonirgIrbhirudIryate |
yo hyAkAshamayo devo dUragaH sarvasaMbhavaH ||3-62-14
yashcha kartA vikartA cha gatirgatimatAM prabhuH |
vedakartA samo loke brahmaNA yaH sanAtanaH ||3-62-15
amUrtimantaM yaM prAhurmahAbhUtaM mahattaraM |
so.agniM samIrayAmAsa shamIgarbhaM samIriNaH ||3-62-16
tridivArohibhirjvAlairjR^imbhamANo disho dasha |
dAnavAnAmabhAvAya yugAntAgnirivotthitaH ||3-62-17
medomajjAmahApa~NkAM keshashaivalashAlinIM |
yodhashIrShopalavanaM mR^itadvipataTotkaTAm ||3-62-18
shoNitodAM raNe dR^iShTvA sa~NgrAmasaritaM vibhuH |
vahniH praskandayAmAsa daityAnAM bhayavardhanaH ||3-62-19
tato.agnirditijAnsarvAnprahlAdapramukhAMstathA |
parAjayAnaH sa vibhuH kroshamano mahAmR^idhe ||3-62-20
kechitpradIptairmukuTaiH kechiddIptaiH shiroruhaiH |
kechitpradIptavasanaiH kechiddIptairbhujAnanaiH ||3-62-21
kechitpradIptairurubhiH kechichChatrairdhvajai rathaiH |
asurAstatra dR^ishyante pradIptenAgninA vR^itAH ||3-62-22
tyaktvA.a.ayudhAni sarvANi sadhvajAMshcha rathottamAn |
prayAnti samare bhItAH pAvakena parAjitAH ||3-62-23
na cha pashyanti te vahniM pradIptadhvajinImukhe |
dishaH khadgAMshcha meghAMshcha dIptAnpashyanti dAnavAH ||3-62-24
dhruvaH svayaMbhuvA sR^iShTo yugAntastoyayoninA |
ityevaM dAnavAH  sarve menire trastachetasaH ||3-62-25
mayashcha shambarashchaiva mahAmAyAdharau tadA |
pArjanyavAruNI mAye sR^ijatAM vArivikShare ||3-62-26
tAbhyAM vahniH sa mAyAbhyAM sichyamAnaH samantataH |
toyaughaiH parvatanibhairmR^idvarchirabhavadraNe ||3-62-27
shamyamAne tu samare pAvake daityanAshini |
bR^ihatkIrtirbR^ihattejA vahnimAha bR^ihaspatiH ||3-62-28

gururuvAcha

hiraNyaretaH sumukha jvalanAhvaya sarvabhuk |
saptajihvAnanakShAma lelihAna mahAbala ||3-62-29
AtmA vAyustava vibho sharIraM sarvavIrudhaH |
yonirApashcha te proktA yonistvamasi chAmbasaH ||3-62-30
UrdhvaM chAdhashcha gachChanti sa~ncharanti cha pArshvataH |
archiShaste mahAbhAga sarvataH prabhavanti cha ||3-62-31
tvamevAgne sarvamasi tvayi sarvamidaM jagat |
tvaM dhArayasi bhUtAni bhuvanaM tvaM bibharShi cha ||3-62-32
tvamagne havyavADekastvameva paramaM haviH |
yajanti cha sadA santastvAmeva paramAdhvare ||3-62-33
tvamannaM prANinAM bhu~NkShe jagdhapItAsi tvaM prabho |
tvayi pravR^itto vijayastvayi lokAH pratiShTitAH ||3-62-34
	sarvA.NllokAMstrInimAnhavyavAha 
		prApte kAle tvaM pachasyeva dIptaH |
	tvamevaikastapase jAtavedo 
		nAnyastvatto vidyate goshu deva ||3-62-35
	vR^iShAkapiH sindhupatistvamagne
		mahAmakheShvagryaharastvameva |
	vishvasya bhUmnastvamasi prasUti-
		stvaM cha pratiShThA bhagavatprajAnAm ||3-62-36
	sR^ijasyato rashmibhirjAtaveda-
		stathauShadhIroShadhInAM rasAMshcha |
	vishvaM tvamAdAya yugAntakAle 
		sraShTA bhavasyAnala sargakAle ||3-62-37
tvamagne sarvabhUtAnAM yonirvedeShu gIyase |
tvayA devahitArthAya nihatA dAnavA raNe ||3-62-38
svayoniste mahAtejastoyaM makhashatArchitaM |
tAM svayoniM samAsAdya kiM viShIdasi pAvaka ||3-62-39
trAyasva samare devAndaityebhyaH surasattama |
pi~NgAkSha lohitagrIva kR^iShNavartmanhutAshana ||3-62-40

iti shrImahAbhArate khileShu harivaMshe bhaviShyaparvaNi 
vAmane.agnistave dviShaShTitamo.adhyAyaH