##Harivamsha Maha Puranam - Part 3 - Bhavishya Parva
Chapter 63  Prahrada talks to Bali
Itranslated by G. Schaufelberger schaufel @ wanadoo.fr
December 4, 2008##
Proof-read by  K S Rmachandran, ramachandran_ksr @ yahoo.ca.
If you find any errors compared to Chitrashala Press edn,
send corrections to A. Harindranath harindranath_a @ yahoo.com
----------------------------------------------------------------

atha triShaShTitamo.adhyAyaH
baliM prati prahrAdavAkhyam


vaishampAyana uvAcha

bR^ihaspatestu vachanaM shrutvA satyaM samIritam |
bhUyaH prajajvAla raNe haviSheva mahAmakhe ||3-63-1
hatAstu mAyA daityAnAM pradIptenAgninA raNe |
hatamAyA hatabalA baliM te samupasthitAH ||3-63-2
parAjiteShu daityeShu vahninAdbhutakarmaNA |
prahrAdastUttaraM vAkyamAha daityapatiM balim ||3-63-3
bhavAnagnishcha vAyushcha bhAskaraH salilaM shachI |
nakShatrANi disho vyoma bhUshcha dAnavasattamama ||3-63-4
bhavishyaM chaiva bhUtaM cha bhavachchAsurasattama |
dattaM chaitadbhagavatA varadena svayaMbhuvA 3-63-5
indratvaM chAmaratvaM cha yuddhe chApyaparAjayaH |
IshitvaM cha vashitvaM cha balaM chaivAmitaM shubham ||3-63-6
sarvabhUteshvaratvaM cha daityarAja sadA tava |
mahAyogIshvaratvaM cha shUratvaM cha mahAmR^idhe ||3-63-7
aNimA laghimA chaiva ye chAnye sAttvikA guNAH |
tatparAjitya daityendra devAnsarvAMshcha sAnugAn ||3-63-8
yathoktaM brahmaNA rAjaMstattathA na tadanyathA |
tasya tadvachanaM shrutvA prahrAdasya mahAtmanaH |
baliH paramasaMhR^iShTaH prAyAchChakrarathaM prati ||3-63-9
	tataH prayAntaM tridashendrasannidhau
		mahAsurendraM balimuttamashriyam |
	tama~njasA jagmurabhipradakShiNaM
		dvijAshcha puNyAH pashavashcha sattamAH ||36-3-10
	mahAjaTAbhAradharAstapasvina-
		stadA tamAhurvidhimantrama~NgalaiH |
	abhiShTuvantaH kavayaH svala~NkR^itam
		baliM prayAntaM raNamUrdhani sthitAH ||3-63-11
	prataptajAmbUnadachitrabhUShaNai-
		rdivyaishcha ratnairvividhairala~NkR^itaH |
	virAjamAnaH parameNa varchasA 
		raNe vibhAtyagnishikheva dAnavaH ||3-63-12
	sa vai tadA shatrubalArditaM balam 
		balirdadarshottamasattvavIryavAn |
	jalAgame shrImadivAbhramaNDalaM
		vishIryamANaM nabhasIva vAyunA ||3-63-13
	tato dadarshAtha balAni sarvato
		raNe praguptAni hutAshanena vai  |
	samuchChritAnyugratarANi tatra vai 
		samudravegAniva parvasandhiShu ||3-63-14
	sashUlashaktyR^iShTigadAsisAyakA-
		nkShipanripUNAM samare mahAtmanAm |
	nanAda siMharShabhamattanAgava-
		jjalAgame toyadavachcha vIryavAn ||3-63-15
	divyAstradhUmaH subhujogravAyu-
		rmahAbalaH pauruShavikramendhanaH |
	prajA didhakShanniva kAlavahniH 
		sughorarUpo vibabhau raNe baliH ||3-63-16

iti shrImahAbhArate khileShu harivaMshe bhaviShyaparvaNi 
vAmanaprAdhurbhAve triShaShTitamo.adhyAyaH