##Harivamsha Maha Puranam - Part 3 - Bhavishya Parva
Chapter 64  Bali Defeats Indra
Itranslated by G. Schaufelberger schaufel @ wanadoo.fr
December 5, 2008##
Proof-read by  K S Rmachandran, ramachandran_ksr @ yahoo.ca.
If you find any errors compared to Chitrashala Press edn,
send corrections to A. Harindranath harindranath_a @ yahoo.com
----------------------------------------------------------------

atha chatuHShaShTitamo.adhyAyaH
balivAsavayoryuddhaM vAsavasya parAjayashcha 


vaishampAyana uvAcha

balinA tu surAH sarve varjayitvA surAdhipam |
raNe sharashatairbhinnAH sasainyA vai parAjitAH ||3-64-1
vimukhA yAti daityendrairvadhyamAnA mahAchamUH |
jitAstu balinA devAH shakramAhUrmahAbalam ||3-64-2

devA UchuH

bhavAnindrashcha dhAtA cha lokAnAM prabhuravyayaH |
tvamapratimakarmA cha tathaivAnupamadyutiH ||3-64-3
vidrutAnIha sainyAni sahAsmAbhiH sureshvara |
rathachakradhvajAkShANi vibhinnAni mahAsuraiH ||3-64-4
rathahastyashvayodhAshcha padAtAshcha sahasrashaH |
bhinnachChinnAshcha shatasho gadAmushalapaTTishaiH ||3-64-5
mahAbhairavarUpaM hi daityendreNa kR^itaM raNe |
kimupekShasi daityendrairhanyamAnAM mahAchamUm ||3-64-6
trAyasva tridashashreShTha sharaNyaH sharaNAgatAn |
shrutvA tu vachanaM teShAM devAnAmamarAdhipaH ||3-64-7
saMvartAgnisamakruddhaH sarvAndahati dAnavAn |
divAkarakarAkAraM kirITaM dhArayanprabhuH ||3-64-8
vaiDUryavarNasa~NkAsho nAnAratnachitA~NgadaH |
mayUraromA raktAkShaH shatabAhuH sahasradR^ik ||3-64-9
harireko harishmashrurnAnAketurmahAbalaH |
vajrapraharaNaH shrImAnyogI shatashirodharaH ||3-64-10
sadhanurbaddhasannAhaH shatAdityasamaprabhaH |
devagandharvayakShaughairanuyAtaH sahasrashaH ||3-64-11
sAmagaishcha japaishchApi stUyamAno maharShibhiH |
shataparvaM mahAraudraM sphoTanaM sarvatomukhaM ||3-64-12
pragR^ihya ruchiraM vajraM dIptaM raudrATTahAsinaM |
daityAnayodhayatsarvAnmahendraH pAkashAsanaH |||3-64-13
adhR^iShyaH sarvabhUtAnAmadityA dayitaH sutaH |
tataH pravR^ittaH sa~NgrAmo balivAsavayostadA ||3-64-14
ubhAbhyAM devadaityAbhyAmachirAnmahadadbhutaH |
ativIryabalodagrastumulo lomaharShaNaH ||3-64-15
prahrAdena stutishataiH karmabhirjayasaMmataiH |
prabodhito daityapatiragniriddha ivAbabhau ||3-64-16
surAsurendrayordR^iShTvA sa~NgrAmaM lomaharShaNam |
devAnAM dAnavAnAM cha bhUyo yuddhamabhUttadA ||3-64-17
tato.avidhyanmahendrastaM balimastrairmahAbalam |
tAnyastrANi mahAbAhushchichCheda shatadhA raNe ||3-64-18
tataH kruddhaH punastatra nijaghne dAnavaM mahat |
Agneyamatha shatrughnaM chikShependro mahAbalaH |
taM dR^iShTvA khe samAgachChatpralayAnalasannibham ||3-64-19
pAtayAmAsa tachchaindraM vAruNAstreNa dhImatA |
sa~Nkruddho maghavA vajramagR^ihNAtparvatopamam ||3-64-20
hantukAmo raNashlAghI baliM daityAdhipaM raNe |
tataH shushrAva devendraH kaushiko harivAhanaH ||3-64-21
asharIrAM shubhAM vAnIM tasminmahati vaishase |
nivartasva mahAbAho surANAM nandivardhana ||3-64-22
puraMdara surashreShTha na jeShyasi raNe balim |
tapasAtyuttamo daityo varadAnena chAdhikaH ||3-64-23
svayaMbhUparitoShAchcha satyadharmAchcha vAsava |
naisha shakyastvayA jetuM tridashairvA sureshvara ||3-64-24
yo hyasya jetA bhagavAMstaM shR^iNushva samAhitaH |
brahmaNaH sa hi sarvasvaM devAnAMchaiva sA gatiH ||3-64-25
paraM rahasyaM dharmasya parasya cha parA gatiH |
parAtparataraH shrImAnparAvaragatiH prabhuH ||3-64-26
sahasrashIrShA puruShaH sahasrAkShaH sahasrapAt |
sha~NkhachakragadApANiH pItavAsAH surArihA ||3-64-27
jetAjeyo jayaH shrImAnso.asya jetA bhaviShyati |
shrutvA divyAM tu madhurAM vANIM tAmasharIriNIm ||3-64-28
apayAto raNAchChakraH sArdhaM sarvaiH surottamaiH |
apayAte tu devendre kaushike harivAhane ||3-64-29
siMhanAdo mahAnAsIddAnavAnAM mahAmR^idhe |
tataH kilakilAshabdaH kShveDitAsphoTitasvanaH ||3-64-30
sha~NkhAnAM ninadashchAtra yodhAnAM valgitasvanaH |
 vAditrANAM cha nirgoShastumulashchAbhavattadA ||3-64-31
jayashabdaravAshchaiva devAnAM tu parAjaye |
sasainyo daityarAjastu stUyamAnaH suhR^idgaNaiH |
balIndro vibabhau daityo hiraNyakashipuryathA ||3-64-32

iti shrImahAbhArate khileShu harivaMshe bhaviShyaparvaNi 
vAmane devAsurasa~NgrAme shakrApayAne 
chatuHShaShTitamo.adhyAyaH