##Harivamsha Maha Puranam - Part 3 - Bhavishya Parva Chapter 105 Hamsa and Dimbhaka Obtain Boons i-translated by G. Schaufelberger schaufel @ wanadoo.fr January 16 2009## Proof-read by K S Rmachandran, ramachandran_ksr @ yahoo.ca. If you find any errors compared to Chitrashala Press edn, send corrections to A. Harindranath harindranath_a @ yahoo.com ---------------------------------------------------------------- atha pa~nchAdhikashatatamo.adhyAyaH haMsaDimbhakayorvaralAbhaH vaishampAyana uvAcha haMsashcha DimbhakashchaivaM tapashchartuM mahAmatI | manashchakraturAtmAMshau sha~Nkarasya nR^ipottama ||3-105-1 gatvA tu himavatpArshvaM tapashchakratura~njasA | uddhishya sha~NkaraM sharvaM nIlagrIvamumApatim ||3-105-2 vIryAstre chaiva nau syAtAmityAdhAya tu mAnase | ekAgrau prayatau bhUtvA vAyvambuprAshinau nR^ipa ||3-105-3 namaste devadeveti sha~Nkareti divAnisham | hara sharva shivAnanda nIlagrIva umApate ||3-105-4 vR^iShadhvaja virUpAkSha haryakSha jagatAM pate | bhaktapriya girIshesha vAsudeva shivAchyuta ||3-105-5 sadyojAta mahAdeva devadeva guhAshaya | bhUtabhAvana devesha praNavAtmansadAshiva ||3-105-6 ityAdinAmabhirnityaM stuvantau sha~NkaraM bhavam | hR^idi kR^itvA virUpAkShaM tapastepatura~njasA ||3-105-7 nirmamau niraha~NkArau maunavratasamAsthitau | varShANIha tadA rAjanpa~ncha chakraturojasA ||3-105-8 tataH prIto.abhavachCharvastAbhyAM saMyamanena cha | sa dadau darshanaM naijaM vyAghracharmadharo haraH ||3-105-9 triyakShaH sha~NkaraH sharvaH shUlapANirumApatiH | agrataH saMsthitaM sharvaM chandrArdhakR^itashekharam | tau dR^iShTvA prItamanasau namaschakratura~njasA ||3-105-10 shrIbhagavAnuvAcha varaM varaya bhadraM vAM yathechChA vAM tathAstu vai | tAvUchatustadA rAjanprItastvaM bhagavanyadi ||3-105-11 devAsurachamUmukhyairyakShagandharvadAnavaiH | AvAmajayyau sarvAtmanneSha nau prathamo varaH ||3-105-12 dvitIyo nau virUpAkSha raudrAstrANAMcha sa~NgrahaH | mAheshvaraM tathA raudramastraM brahmashiro mahat ||3-105-13 abhedhyaM kavachaM divyamachChedyaM chApi kArmukam | parashuM cha tathA sharva sadA rakShArhameva cha ||3-105-14 sahAyau dvau mahAdeva bhUtau yuddhe hi gachChatAm | evamastviti devesha Aha bhR^i~NgiriTI haraH ||3-105-15 kuNDodaraM virUpAkShaM sarvaprANihite ratam | yuvAmatha cha bhUteshau sahAyau satataM raNe ||3-105-16 sa~NgrAmaM gachChatAM ghorametayorbalashAlinoH | ityuktvA bhagavA~nCharvastatraivAntaradhIyata ||3-105-17 tatastau vIryasaMpannau haMso Dimbhaka eva cha | kR^itAstrau shastrasaMpannau chApinau vIryavattarau ||3-105-18 Amuktakavachau vIrAvajayyau devadAnavaiH | atyantabhaktau deveshe sha~Nkare nIlalohite ||3-105-19 nityotsavakarau deve bhasmoddhUlanashobhinau | kR^itatripuNDrako nityaM jaTAyuktashirodharau ||3-105-20 rudrAkShArpitasarvA~Ngau vyAghracharmAmbarAvR^itau | namaH shivAya shAntAya mahAdevAya dhImate ||3-105-21 ityadibhirmahAdevaM stuvantau nAmabhiH shivam | sAkShAdiva mahAdevau rejaturjaladhAriNau ||3-105-22 tataH svabhavanaM gatvA pituH pAdAvagR^ihyatAm | pitushcha sakhyurbalinau mAtushcha charaNau tadA ||3-105-23 janArdano.api dharmAtmA kAlena mahatA nR^ipa | vidyApAraM mahAbuddhiryuktenAsAvupeyivAn ||3-105-24 sa cha viShNuM hriShIkeshaM pItakausheyavAsasam | brahmatattvaparo nityamupAste vijitendriyaH ||3-105-25 haMsashcha Dimbhakashchaiva kR^itadArau babhUvatuH | janardano.api dharmAtmA kR^itadAro babhUva ha ||3-105-26 sarve te yaj~naniratAH pa~nchayaj~naparAstathA | svadAraniratAH sarve gurushushruShaNe ratAH | dharma eva paraM shreya iti te menire nR^ipa ||3-105-27 iti shrImahAbhArate khileShu harivaMshe bhaviShyaparvaNi haMsaDimbhakopAkhyAne pa~nchAdhikashatatamo.adhyAyaH