##Harivamsha Mahapuranam - Part 1 - Harivamsha parva Chapter 37 Babhruvamshavarnanam Itranslated and proofread by K S Ramachandran ramachandran_ksr@yahoo.ca, June 28, 2007 Note: Verse 3 bahyaka and upabahyaka are daughters of srinjaya and therefore should be known together as srinjayyau, not sanjayyau: as found in Chitrashala edn. ## Further proof-read by Gilles Schaufelberger, schaufel @ wanadoo.fr If you find any errors compared to Chitrashala Press edn, send corrections to A. Harindranath, harindranath_a @ yahoo.com --------------------------------------------------------------------- saptatriMsho.adhyAyaH babhruvaMshavarNanam vaishampAyana uvAcha sattvatAtsattvasaMpannAnkaushalyA suShuve sutAn | bhajinaM bhajamAnaM cha divyaM devAvR^idhaM nR^ipam || 1-37-1 andhakaM cha mahAbAhuM vR^iShNiM cha yadunandanam | teShAM visargAshchatvAro vistareNeha tA~nChR^iNu || 1-37-2 bhajamAnasya sR^i~njayyau bAhyakAthopabAhyakA | AstAM bhArye tayostasmAjjaj~nire bahavaH sutAH || 1-37-3 kR^imishcha kramaNashchaiva dhR^iShTaH shUraH puraMjayaH | ete bAhyakasR^i~njayyAM bhajamAnAdvijaj~nire || 1-37-4 ayutAjitsahasrAjichChatAjichchAtha dAshakaH | upabAhyakasR^i~njayyAM bhajamAnAdvijaj~nire || 1-37-5 yajvA devavR^idho rAjA chachAra vipulaM tapaH | putraH sarvaguNopeto mama syAditi nishchitaH || 1-37-6 saMyujyAtmanamevaM tu parNashAyA jalaM spR^ishan | sadopaspR^ishatastasya chakAra priyamApagA || 1-37-7 chintayAbhiparItA sA jagAmaikAbhinishchayam | kalyANatvAnnarapatestasya sA nimnagottamA || 1-37-8 nAdhyagachChata tAM nArIM yasyAmevaMvidhaH sutaH | jAyettasmAtsvayaM hanta bhavAmyasya sahavratA || 1-37-9 atha bhUtvA kumArI sA bibhratI paramaM vapuH | varayAmAsa nR^ipatiM tAmiyeSha cha sa prabhuH || 1-37-10 tasyAmAdhatta garbhaM cha tejasvinamudAradhIH | atha sA dashame mAsi suShuve saritAM varA || 1-37-11 putraM sarvaguNopetaM babhruM devAvR^idhAnnR^ipAt | atra vaMshe purANaj~nA gAyantIti parishrutam || 1-37-12 guNAndevAvR^idhasyAtha kIrtayanto mahAtmanaH | yathaivAgre samaM dUrAtpashyAma cha tathAntike || 1-37-13 babhruH shreShTho manuShyANAM devairdevAvR^idhaH samaH | ShaShTishcha ShaTcha puruShAH sahasrANi cha sapta cha || 1-37-14 ete.amR^itatvaM saMprAptA babhrurdevAvR^idhAvapi | yajvA dAnapatirvidvAnbrahmaNyaH sudhR^iDhAyudhaH || 1-37-15 kIrtimAMshcha mahAtejAH sAttvatAnAM mahAvaraH | tasyAnvavAyaH sumahAnbhojA ye mArtikAvatAH || 1-37-16 andhakAtkAshyaduhitA chaturo.alabhadAtmajAn | kukuraM bhajamAnaM cha shamiM kambalabarhiSham || 1-37-17 kukurasya suto dhR^iShNurdhR^iShNostu tanayastathA | kapotaromA tasyAtha taittiristanayo.abhavat || 1-37-18 jaj~ne punarvasustasmAdabhijittu punarvasoH | tasya vai putramithunaM babhUvAbhijitaH kila || 1-37-19 AhukashchAhukI chaiva khyAtau khyAtimatAM varau | imAM chodAharantyatra gAthAM prati tamAhukam || 1-37-20 shvetena parivAreNa kishorapratimo mahAn | ashIticharmaNA yuktaH sa nR^ipaH prathamaM vrajet || 1-37-21 nAputravAnnAshatado nAsahasrashatAyuShaH | nAshuddhakarmA nAyajvA yo bhojamabhito vrajet || 1-37-22 pUrvasyAM dishi nAgAnAM bhojasyetyanumodanam | sopAsa~NgAnukarShANAM dhvajinAM savarUthinAm || 1-37-23 rathAnAM meghaghoShANAM sahasrANi dashaiva tu | rUpyakA~nchanakakShANAM sahasrANi dashApi cha || 1-37-24 tAvantyeva sahasrANi uttarasyAM tathA dishi | A bhUmipAlAnbhojAnsvAnuttiShThanki~NkiNIkiNaH || 1-37-25 AhukIM chApyavantibhyaH svasAraM dadurandhakAH | Ahukasya tu kAshyAyAM dvau putrau saMbabhUvatuH || 1-37-26 devakashchograsenashcha devaputrasamAvubhau | devakasyAbhavanputrAshchatvArastridashopamAH || 1-37-27 devavAnupadevashcha sudevo devarakShitaH | kumAryaH sapta chAsyAsanvasudevAya tA dadau || 1-37-28 devakI shantidevA cha sudevA devarakShitA | vR^ikadevyupadevI cha sunAsI chaiva saptamI || 1-37-29 navograsenasya sutAasteShAM kaMsastu pUrvajaH | nyagrodhashcha sunAmA cha ka~NkaH sha~NkuH subhUmipaH || 1-37-30 rAShTrapAlo.atha sutanuranAdhR^iShTishcha puShTimAn | teShAM svasAraH pa~nchA.a.asankaMsA kaMsavatI tathA || 1-37-31 sutanU rAShTrapAlI cha ka~NkA chaiva varA~NganA | ugrasenaH sahApatyo vyAkhyAtaH kukurodbhavaH || 1-37-32 kukurANAmimaM vaMshaM dhArayannamitaujasAm | Atmano vipulaM vaMshaM prajAvAnApnuyAnnaraH || 1-37-33 iti shrImahAbhArate khileShu harivaMshe harivaMshaparvaNi saptatriMsho.adhyAyaH