##Harivamsha Mahapuranam - Part 1 - Harivamsha Parva Chapter 38 Itranslated and proofread by K S Ramachandran ramachandran_ksr @ yahoo.ca , 15 August, 2007 ## Further proof-read by Gilles Schaufelberger, schaufel @ wanadoo.fr If you find any errors compared to Chitrashala Press edn, send corrections to A. Harindranath, harindranath_a @ yahoo.com --------------------------------------------------------------------- vaishampAyana uvAcha bhajamAnasya putro.atha rathamukhyo vidUrathaH | rAjAdhidevaH shUrastu vidUrathasuto.abhavat || 1-38-1 rAjAdhidevasya sutA jaj~nire vIryavattarAH | dattAtidattabalinau shoNAshvaH shvetavAhanaH || 1-38-2 shamI cha daNDasharmA cha daNDashatrushcha shatrujit | shravaNA cha shraviShThA cha svasArau saMbabhUvatuH || 1-38-3 shamIputraH pratikShatraH pratikShatrasya chAtmajaH | svayaMbhojaH svayaMbhojAddhR^idIkaH saMbabhUva ha || 1-38-4 tasya putrA babhUvurhi sarve bhImaparAkramAH | kR^itavarmAgrajasteShAM shatadhanvAtha madhyamaH || 1-38-5 devarShervachanAttasya bhiShagvaitaraNashcha yaH | sudAntashcha vidAntashcha kAmadA kAmadantikA || 1-38-6 devavAMshchAbhavatputro vidvAnkambalabarhiShaH | asamaujAstathA vIro nAsamaujAshcha tAvubhau || 1-38-7 ajAtaputrAya sutAnpradadAvasamaujase | sudaMShTraM chArurUpaM cha kR^iShNamityandhakAstrayaH || 1-38-8 ete chAnye cha bahavo andhakAH kathitAstava | andhakAnAmimaM vaMshe dhArayedyastu nityashaH || 1-38-9 Atmano vipulaM vaMshaM labhate nAtra saMshayaH | gAndhArI chaiva mAdrI cha kroShTabhArye babhUvatuH || 1-38-10 gAndhArI janayAmAsa anamitraM mahAbalam | mAdrI yudhAjitaM putraM tato vai devamIDuSham || 1-38-11 anamitramamitrANAM jetAramaparAjitam | anamitrasutau nighno nighnato dvau babhUvatuH || 1-38-12 prasenashchAtha satrAjichChatrusenAjitAvubhau | praseno dvAravatyAM tu nivasantyAM mahAmaNim || 1-38-13 divyaM syamantakaM nAma samudrAdupalabdhavAn | tasya satrAjitaH sUryaH sakhA prANasamo.abhavat || 1-38-14 sa kadAchinnishApAye rathena rathinAM varaH | abdhikUlamupaspraShTuMupasthAtuM yayau ravim || 1-38-15 tasyopatiShThataH sUryaM vivasvAnagrataH sthitaH | aspaShTamUrtirbhagavAMstejomaNDalavAnprabhuH || 1-38-16 atha rAjA vivasvantamuvAcha sthitamagrataH | yathaivaM vyomni pashyAmi sadA tvAM jyotiShAMpate || 1-38-17 tejomaNDalinaM devaM tathaiva purataH sthitam | ko visheSho.asti me tvattaH sakhyenopagatasya vai || 1-38-18 etachChrutvA tu bhagavAnmaNiratnaM syamantakam | svakaNThAdavamuchyaiva ekAnte nyastavAnvibhuH | tato vigrahavantaM taM dadarsha nR^ipatistadA || 1-38-19 prItimAnatha taM dR^iShTvA muhUrtaM kR^itavAnkathAm || 1-38-20 tamapi prasthitaM bhUyo vivasvantaM sa satrajit | lokAnudbhAsayasyetAnyena tvaM satataM prabho | tadetanmaNiratnaM me bhagavandAtumarhasi || 1-38-21 tataH syamantakamaNiM dattavAMstasya bhAskaraH | sa tamAbadhya nagarIM pravivesha mahIpatiH || 1-38-22 taM janAH paryadhAvanta sUryo.ayaM gachChatIti ha | purIM vismApayitvA cha rAjA tvantaHpuraM yayau || 1-38-23 tatprasenajitaM divyaM maNiratnaM syamantakam | dadau bhrAtre narapatiH premNA satrAjiduttamam || 1-38-24 sa maNiH syandate rukmaM vR^iShNyandhakaniveshane | kAlavarShI cha parjanyo na cha vyAdhibhayaM hyabhUt || 1-38-25 lipsAM chakre prasenAttu maNiratne syamantake | govindo na cha tallebhe shakto.api na jahAra saH || 1-38-26 kadAchinmR^igayAM yAtaH prasenastena bhUShitaH | syamantakakR^ite siMhAdvadhaM prApa vanecharAt || 1-38-27 atha siMhaM pradhAvantamR^ikSharAjo mahAbalaH | nihatya maNiratnaM tadAdAya bilamAvishat || 1-38-28 tato vR^iShNyandhakAH kR^iShNaM prasenavadhakAraNAt | prArthanAM tAM maNerbuddhvA sarva eva shasha~Nkire || 1-38- 29 sa sha~NkyamAno dharmAtmA nakArI tasya karmaNaH | AhariShye maNimiti pratij~nAya vanaM yayau || 1-38-30 yatra praseno mR^igayAmAcharattatra chApyatha | prasenasya padaM gR^ihya puruShairAptakAribhiH || 1-38-31 R^ikShavantaM girivaraM vindhyaM cha girimuttamam| AnveShayanparishrAntaH sa dadarsha mahAmanAH || 1-38-32 sAshvaM hataM prasenaM vai nAvindachchechChitaM maNim| atha siMhaH prasenasya sharIrasyAvidUrataH || 1-38-33 R^ikSheNa nihato dR^iShTaH pAdairR^ikShashcha sUchitaH | pAdairanveShayAmAsa guhAmR^ikShasya mAdhavaH || 1-38-34 mahatyR^ikShabile vANIM shushrAva pramaderitAm | dhAtryA kumAramAdAya sutaM jAmbavato nR^ipa | krIDApayantyA maNinA mA rodIrityatheritAm || 1-38-35 dhAtryuvAcha siMhaH prasenamavadhItsiMho jAmbavatA hataH | sukumAraka mA rodIstava hyeSha syamantakaH || 1-38-36 suvyaktIkR^itashabdastu tUShNIM bilamathAvishat | prAvishya chApi bhagavAMstamR^ikShabilama~njasA || 1- 38-37 sthApayitvA biladvAri yadU.NllA~NgalinA saha | shAr~NgadhanvA bilasthaM tu jAmbavantaM dadarsha ha || 1-38-38 yuyudhe vAsudevastu bile JAmbavatA saha | bAhubhyAmeva govindo divasAnekavimshatiM || 1-38-39 praviShte tu bilaM kR^iShNe baladevapuraHsarAH | purIM dvAravatImetya hataM kR^iShNaM nyavedayan || 1-38-40 vAsudevastu nirjitya jAMbavantaM mahAbalam | bheje jAMbavatIM kanyAmR^ikSharAjasya saMmatAm | maNiM syamantakaM chaiva jagrAhAtmavishuddhaye|| 1-38-41 anunIyarkSharAjAnaM niryayau cha tadA bilAt | dvArakAmagamatkR^iShNaH shriyA paramayA yutaH || 1-38-42 evaM sa maNimAhR^itya vishoddhyAtmanamachyutaH | dadau satrAjite taM vai sarvasAttvatasaMsadi || 1-38-43 evaM mithyAbhishaptena kR^IShNenAmitraghAtinA | AtmA vishodhitaH pApAdvinirjitya syamantakam || 1-38-44 satrAjito dasha tvAsanbhAryAstAsAM shataM sutAH | khyAtimantastrayasteShAM bha~NgakArastu pUrvajaH || 1-38-45 vIro vAtapatishchaiva upasvAvAMshcha te trayaH | kumAryashchApi tisro vai dikShu khyAtA narAdhipa || 1-38-46 satyabhAmottamA strINAM vratinI cha dR^iDhavratA | tathA prasvApinI chaiva bhAryAM kR^iShNAya tAM dadau || 1-38-47 samAkSho bha~NgakAristu nAreyashcha narottamau | jaj~nAte guNasaMpannau vishrutau rUpasaMpadA || 1-38-48 mAdrIputrasya jaj~ne.atha pR^ishniH putro yudhAjitaH | jaj~nAte tanayau pR^ishneH shvaphalkashcitrakastathA || 1-38-49 shvaphalkaH kAshirAjasya sutAM bhAryAmavindata | gAMdinIM nAma tasyAshcha sadA gAH pradadau pitA || 1-38-50 tasyAM jaj~ne mahAbAhuH shrutavAniti vishrutaH | akrUro.atha mahAbhAgo yajvA vipuladakShiNaH || 1-38-51 upAsa~NgastathA ma~NgurmR^idurashchArimejayaH | girikShipastathopekShaH shatruhA chArimardanaH || 1-38-52 dharmabR^idyatidharmA cha gR^idhrabhojo.andhakastathA | subAhuH pratibAhushcha sundarI cha varA~NganA || 1-38-53j vishrutA sAMbamahiShI kanyA chAsya vasundharA | rUpayauvanasaMpannA sarvasattvamanoharA || 1-38-54 akrUreNograsenyAM tu sutau dvau kurunandana| sudevashchopadevashcha jaj~nAte devavarchasau || 1-38-55 chitrakasyAbhavanputrAH pR^ithurvipR^ithureva cha| ashvagrIvo.ashvabAhushcha supArshvakagaveShaNau || 1-38-56 ariShTanemerashvashcha sudharmA dharmabhR^ittathA| subAhurbahubAhushcha shraviShThAshravaNe striyau || 1-38-57 imAM mithyAbhishastiM yaH kR^iShNasya samudAhR^itAm | veda mithyAbhishApAstaM na spR^ishanti kadAchana || 1-38- 58 iti shrImahAbhArate khileShu harivaMshe harivaMshaparvaNyaShTatriMsho.adhyAyaH