Harivamsha, volume II, Appendix II, BORI, 1971
shrIgaNeshAya namaH
hari OM

sheShadharmaprakaraNam - 2

itranslated by A. Purushothaman, purushothaman_avaroth @yahoo.com

haribhaktimAhAtmyakathanam

vaishaMpAyana uvAcha

surasindhusutaH shrImAnAj~napto vai murAriNA  |
AtmanA taM namask^Ritya prA~n~jalirvAkyamabravIt  ||  2-1

bhIShma uvAcha

viddhi pANDava deveshaM sarvadAtAramachyutam  |
lokatrANAya saMbhUtaM kR^iShNaM sAkShAjjagadgurum  ||  2-2
AdhAraM sarvabhUtAnAM pAlayantamasheShakam  |
harantaM sarvasaMtApaM kR^iShNaM viddhi jagadgurum  ||  2-3
dharme dharmabhR^itAM pArtha hyarthamarthavatAM prabhum  |
satyaM satyavatAM  kR^iShNaM kAmadaM viddhi kAminAm  |  
sukhaduHkhasyakartAsau bhaktAnAmasatAmapi  ||  2-4
ayameva paro  mantro hyayameva paraM tapaH  |  
ayameva paraM j~nAnamayameva parA gatiH  ||  2-5   
ayameva paro bandhurayameva suhR^ittamaH  |  
tasmAdbhajasva kaunteya sarvasaMpadbhavettava  ||  2-6

yudhiShThira uvAcha

pitAmaha mahAprAj~na sarvashAstravishArada  |
kR^iShNe dharme cha me bhaktiryathA syAddhi tathA vada  ||  2-7
shrotukAmA amI pArthA R^iShayashcha tapodhanAH  |
yajvAno devatAH sarvAstathA devA divi sthitAH  ||  2-8

bhIShma uvAcha

shR^iNu  pANDava vakShyAmi haribhaktiM sudurlabhAm  |
shrotR^INAM sarvapApaghnIM vadatAM cha yudhiShThira  ||  2-9
nArAyaNaM jagadyoniM sachchidAnandavigraham  |
yajasva  narashArdUla  kR^iShNaM brahmasvarUpiNam  ||  2-10
ripavastaM na hiMsanti na bAdhante grahAshcha tam  |
rAkShasAshcha na khAdante hyenaM kR^iShNaparAyaNam  ||  2-11
bhaktirdR^iDhA bhavedyasya devadeve janArdane  |
shreyAMsi tasya siddhyanti bhaktimAnadhikastataH  ||  2-12
tau pAdau saphalau puMsAM viShNavAyatanagAminau  |
tau karau bhAgyanilayau viShNupUjAparAyaNau  ||  2-13
te cha netre mahAbhAge pashyato ye janArdanam  |
sA jihvA prochyate sadbhirharinAma parAyaNA   ||   2- 14
satyaM satyaM punaH satyamuddhR^itya bhujamuchyate  |
vedashAstrAtparaM nAsti  na daivaM keshavAtparam  ||  2-15
satyaM vachmi hitaM vachmi sAraM vachmi punaH punaH  |  
asAre dagdhasaMsAre sAraM yadviShNupUjanam  ||  2-16
sarvabhUtadayAyukto viShNupUjAparAyaNaH  |
mAtA pitroshcha shushrUShustasya tuShTo janArdanaH  ||  2-17
satkathAyAM cha ramate satkathAM  cha karoti yaH  |
satyavA~N nirahaMkArastasya prIto ramApatiH   ||  2-18
nAmasaMkIrtanaM viShNoH kShutapraskhalanAdiShu |
karoti satataM pArtha tasya viShNuH prasIdati  ||  2-19
yA tu nArI patiprANA patipUjAparAyaNA  |
tasyAstuShTo jagannAthaH kR^iShNo lokahite rataH  ||  2-20
tasmAchChR^iNuShva kaunteya yajasva satataM vibhum  |
mA kuru tvamahaMkAraM vidyullolAH shriyo yataH   ||  2-21 
sharIraM mR^ityusaMyuktaM  jIvitaM chApi cha~nchalam  |
balAdhikairdhanaM grAhyaM saMpadaH kShaNabh~NgurAH  ||  
tasmAdbhajasva kaunteya puNDarIkAkShamavyayam  ||  2-22
he pArthAH kiM na jAnidhvamAyuSho.ardhaM tu nidrayA  ||  
hR^itam cha bhojanAdyaishcha kiyadAyuH samAhR^itam  |  2-23
kiyadAyurbAlabhAvAtkiyadAyushcha  vArdhakAt  |
kiyadviShayabhogaishcha kadA dharme kariShyatha  ||  2-24
bAlabhAve cha vR^iddhatve na ghaTetAchyutArchanam  |
vayasyeva cha dharmAnvai kurudhvamanahaMkR^itAH  ||  2-25
sharIraM roganilayaM malAdyaiH paridUShitam  |
kimarthaM shAshvatadhiyA pApaM kurvanti mAnavAH  ||  2-26
asArabhUte saMsAre nAnAduHkhasamanvite  |
vishvAso nAtra kartavyo nishchitaM nAshameShyati  ||  2-27 
shR^iNudhvaM pANDavashreShThAH satyameva mayochyate  |
kAyaH saMnihitApAyaH pUjya eva janArdanaH  || 2-28
mAnaM tyajathAhaMkAraM kAmakrodhAdisaMyutam  |
yajadhvaM satataM viShNuM mAnuShyamatidurlabham  ||  2-29
koTijanmasahasreShu sthAvarAdiShu pANDava  |
saMbhrAntasya cha mAnuShyaM kathaMchitparilabhyate  ||  2-30
tatrApi devatAvuddhirdAnabuddhishcha pANDava  |
bhogabuddhistadA nR^INAM janmAntaratapaHphalam  ||  2-31
mAnuShyam  durlabhaM prApya yo hariM nArchayetsakR^it  |
mUrkhaH parataraH pArtha ko.anyastasmAdachetasaH  ||  2-32      
ArAdhito jagannAtho dadAtyabhihitaM phalam  |
kastaM na  pUjayedvidvAnsaMsArAgniprapIDitaH  ||  
yasmiMstuShTe jagattuShTaM yataH sarvagato hariH  ||  2-33
yathA hastipade sarvaM pAdamAtraM pralIyate  |
AkAshena yathA vyAptaM jagatsthAvara ja~Ngamam  |
tathaiva hariNA vyAptaM  jagatsthAvara ja~Ngamam  ||  2-34
janane maraNaM pArtha maraNe janmasAdhanam  |
ubhe te  nikaTe nR^INAM tannAsho harisevayA  ||  2-35
dhyAtaH smR^itaH pUjito vA stuto vA namito.api vA  |
saMsArapAshavichChedI kastaM na pratipUjayet  ||  2-36
yannAmochchAraNAdeva mahApAtakanAshanam  |
yaM samabhyarchya rAjendra padaM mokShamavApsyatha  ||  2-37
aho chitramaho chitramaho  chitraM hi pANDava  |
harinAmni sthite lokaH saMsAre vartate punaH  ||  2-38
yAvannedriyavaikalyaM  yAvadvyAdhirna bAdhate  |
tAvadevArchayennityaM yadi muktirato nR^ipa  ||  2-39
bhUyo bhUyo hitaM vachmi bhujamuddhR^itya pANDava  |
kR^iShNo.ayaM sarvathA pUjyo  bhuktimuktiprado nR^iNAm  ||  2-40
krodhamUlaM manaH pArtha krodhaH saMsArasAdhanam  |
dharmakShayakaraH  krodhastasmAttaM parivarjayet  ||  2-41
mana eva manuShyANAM kAraNaM bandhamokShayoH  |
tasmAttadeva  saMyojya tasminkR^iShNe sukhI bhava  ||  2-42
anArAdhya jagannAthaM sarvakAmaphalapradam  |
saMsArasAgare magnAH kathaM pAraM gamiShyatha  ||  2-43
achyutAnandagovindanAmochchAraNabheShajAt  |
nashyanti sakalA rogAH  satyaM satyaM vadAmyaham  ||  2-44
harishraddhAvatAM puMsAM na sutairnnApi bAndhavaiH  |
tasmAchcha sarvadeveshe bhaktiM kuruta pANDavAH  ||  2-45
bandhumatvaM dhanADhyatvaM putravatvaM cha pANDava  |
viShNubhaktimatAM nR^INAM bhavejjanmani janmani  ||  2-46
ihAmutraphalaM liptsuH pUjayetsatataM hariH  |
ihAmutraphalaM nechchanparanindAparo bhavet  ||  2-47
na namedviShNave yatsya sharIraM karmabhedine  |  
pApAnAmAkaram taddhi j~neyam kurukulottama  ||  2-48
tasmAChR^iNuta rAjendra haribhaktiparAyaNAH  |
shreShThAH sarvatra vikhyAtA hyato bhaktiH sudurlabhA  ||  2-49
asUyArahitA ye cha vipratrANaparAyaNAH  |
kAmAdirahitA ye cha teShAM tuShyati keshavaH  ||  2-50
tasmAtsaMsArataptAnAM harireva parA gatiH  |
yannAmashravaNadeva prayAti paramaM padam  ||  2-51
yAdavendramamuM viddhi kR^iShNaM lokesvaraM harim  |
asya prasAdAtte sarvaM bhaviShyati na saMshayaH  ||  2-52
sraShTA pAlayitA hantA kR^iShNohi jagatIpatiH  |
asmadvai sakalAndharmA~nChR^iNuShva cha sukhI bhava  ||  2-53
vaishaMpAyana uvAcha
iti devavratenoktaM nishamya kurunandanaH  |
samtuShThamAnaso  bhUtvA shrotukAmo.abhavattadA  ||  2-54
ya idaM kIrtayennityaM puNyaM pApapraNAshanam  |
haribhaktikaraM nR^INAM smR^itAnAmaghanashanam  ||  2-55
brAhmaNAnAM samAje cha tathA viShNvAlaye paThet  |
paraM vimAnamArUDho viShNulokaM sa gachChati  ||  2-56            


    
November 14, 2008