Harivamsha, volume II, Appendix II, BORI, 1971 shrIgaNeshAya namaH hari OM sheShadharmaprakaraNam 5 itranslated by A. Purushothaman, purushothaman_avaroth @yahoo.com godAnaprashaMsA yudhiShThira uvAcha godAnaM hi mahatpuNyamiti chAhurmaharShayaH | vistareNa jagannAtha tanme tvaM kR^ipayA vada || 5-1 kena chAdau purA dattA prApyate sumahatphalam | tatsarvaM hi bhavAnvetti kR^ipayA vada suvrata || 5-2 shrIbhagavAnuvAcha shR^iNu pANDava vakShyAmi shrotR^INAmaghanAshanam | susharmaNastu charitaM sarvaM ma~NgaladAyakam || 5-3 susharmA nAma viprendro brAhmaNo vedapAragaH | shAnto jitendriyo rAjansarvasaMpatsamAyutaH || 5-4 sarvakratuH sadA yajvA visheSheNa mama priyaH | nityaM dAnarato nityaM sadA sarvahite rataH | purANavaktA kaunteya bandhUnAM hitakR^itsadA || 5-5 evaM pravartamAnasya bahuputrasya dhImataH | jarA prAptA tadA rAjansapatnIva nR^ipAtmaja || 5-6 palitaM tu svakaM dehaM dR^iShtvA rAjendra sa dvijaH | vanaM vivesha dharmAtmA munivR^indaniShevitam || 5-7 tatrArAdhya paraM devaM vAsudevAkhyamavyayam | jagAma tapasA svargaM saMshoShitakalevaraH || 5-8 tatra tiShTati dharmiShThe vipravarye yudhiShThira | vR^itrArernikaTaM prAptA devadUtA mahAbalAH || 5-9 UchuH sasaMbhramaM rAjandevarAjaM puraMdaram | balabhichChrUyatAM deva yadarthamiha chAgatAH || 5-10 yamadUtA mahAtmAnaH pAshahastAH bhayaMkarAH | svargArhAnmanujAnnAtha hyasmAkaM vashavartinaH | niruddhya pathi te dUtaH prApayanti yamAlayam || 5-11 taiH sArdhaM bahudhAyudhya hyashaktAtvAmupAgatAH | tadupAyaM vadasva tvaM yenedaM prApnuvanti te || 5-12 indra uvAcha divaM mamAj~nayA yAntu dharmiShThA manujottamAH | pApinAM narakaM j~neyaM dharmiShThAnAM triviShTapam || 5-13 sarveShAM gopradAnena pAparAshiH praNashyati | tatparaM yAntu dharmiShThA godAnAddhUtakalmaShAH | tadAprabhR^iti dharmiShThA dR^iShTvA yAnti yamaM divaM || 5-14 tadatbhutamidaM dR^iShTvA brAhmaNo devasaMnidhau | upadeShTuM svakAnputrAniyeSha dvijasattamaH || 5-15 putrANAM tatsakAshaM tu vimAnena sametya cha | putrAH shR^iNuta madvAkyaM yUyaM svargaM yadIpsatha | dAtavyaM gopradAnaM hi yuShmAbhistu prayatnataH || 5-16 asharIraM vachaH shrutvA putrA bandhujanA api | AshcharyaM paramaM jagmurghoShayanti sma nityashaH || 5-17 tachChrutvA vismitAH sarve dvijAH godAnatatparAH | abhavannantyakAle.api nishreya iti sarvataH || 5-18 tasmAddadadhvaM godAnamapamR^ityuvidArakaM | svargadaM svargakAmAnAM shrIkaraM shriyamichChatAM || 5-19 tadAprabhR^iti dharmiShThA yamena paripUjitAH | gopradAnaratA martyA divaM yAnti svavaMshajaiH || 5-20 ekAM cha dashagurdadyAddasha dadyAchcha goshati | shataM sahasragurdadyAtsamametattrayaM phalam || 5-21 godAnatparamaM dAnam naiva kiMchijjagattraye | sA gaunyAryArjitA dattA kR^itsnaM tArayate kulam || 5-22 amR^itaM vai gavAM kShIramityuvAcha prajApatiH | tasmAddadAti yo rAjannamR^itatvaM cha gachChati || 5-23 vR^iddhAya yUne yo dadyAttathaiva brahmachAriNe | gAM dadyAchChrutavidyAya daridrAya kutumbine || 5-24 paurANikAya bhUpAla shrotriyAyAhitAgnaye | vR^ittihInAya vai deyaM godAnaM svargamichChatA || 5-25 puNyakShetre puNyakAle mAtApitR^idine tathA | chandrasUryoparAge cha dAtavyAH gauH prayatnataH || 5-26 saMkrAntau janmanakShatre hyayane viShuve tathA | pretAhe cha sapiNDe cha vyatipAte mahAlaye | yo dadAti gavAM dAnaM mama |okaM sa gachChati || 5-27 gavAmabhAve sauvarNaM dviniShkaM puShpapUjitaM | matsannidhau cha mAM dhyAtvA dadyAdgachChenmamAlayam || 5-28 yatra vai brAhmaNaM pashyechChrotriyaM niyatendriyaM | etatkAlamahaM manye paramaM shrAddhadAnayoH || 5-29 shriyamAyuShkaraM dAnaM putrapautrapravardhanam | godAnAtparamaM dAnaM nAsti kiMchijjagattraye || 5-30 nityaM dadasva bhUpAla yadi svargaM tvamichChasi | shriyaM cha vipulA loke gamiShyasi na saMshayaH || 5-31 ityetachChR^iNuyAnnityaM yashchApi parikIrtayet | svarlokaM samavApnoti gopradAnaphalaM labhet || 5-32 November 22, 2008