harivaMsha, Volume II,  Appendix 1, pp.62-65, BORI 1971

13
itranslated by A. Purushothaman, purushothaman_avaroth @ yahoo.com

vAmadevabharadvAjayoH  kR^iShNadarshanArthaM  vR^indAvanAgamanam 

bhANDIre sukhamAsInaM  viharantaM  janArdanam  |
vAmadevabharadvAjau tatra prAptau  yardR^ichChayA  ||  13-1
kR^iShNAjinadharau  dAntau niyamavratakarshitau  |
ga~NgAtIrthAya  saMkrAntau  bhAskarau dvAvivAgatau  ||  13-2
bR^ihatpi~NgajaTAbhArapratibaddhashirodarau  |
pramANaM   sarvalokAnAM  vedavedA~NgapAragau  ||  13-3
valkalAjinasaMvItau  munI yamaparau  sadA  |
namaskartuM tadA vIra  bhANDIraM  yakShasevitam  ||  13-4
pradakShiNaM  samudyuktau  vatsapalAnmahAmunI  |
dadarshatuH samaM vatsAnkAlayAnAMshcha  gogaNAn  ||  13-5
paprachChatustadA tatra bhANDIradrumavAsinaH  |
he vatsAH kva cha no mArgo  yamunAtIrthadarshane  |
kva cha tIrthaM susopAnaM jhaShagrAhavivarjitam  ||  13-6
shrutvaitaddArakA vAkyaM jahasurmunipuMgavau  |
mArgaj~nA  na vayaM bAlA j~nAnibhyaH saMprapR^ichChatAm |
kuto.atra  yamunA shubrA kuto mArgaH kuto vayam ||  13-7
etasminnantare kR^iShNasteShAM  vAkyaM tayorapi  |
shrutvA tau samupAgamya  vaktumevaM  prachakrame  ||  13-8
eSha vAM patha AdeShTA  gavAmiva suyantritaH  |
ahaM nandasya tanayaH kR^iShNa ityabhivishrutaH  ||  13-9
mamAyamagrajo rAmashchandramA iva bhAsate  |
AvayorgogaNaH sarvo vachanaM cha nishamyatAm  ||  13-10
etaddadhyodhanaM samyaggR^ihyatAM  yadi rochate  |
pAyasaM  surasaM dugdhaM  dhAnAshcha guDamishritAH  ||  13-11
evamukte tatastasminkR^iShNe kamalalochane  |
tau kAvimAviti tadA   samAdhiM jagmaturmunI  ||  13-12
tau netrANi samunmIlya  prItau dR^iShtvA  jagatpatim  |
idamUchaturadhyAtmaM  munI kR^iShNasya  saMmatam  || 13-13
tvAmAdiH sarvabhUtAnAM  madhyamantastathA  bhavAn  |
sraShTA  sarvasya |okasya  pAtA bhoktA janArdana  ||  13-14
sraShTA  vedasya yaj~nasya  haviShAbhR^itvijAM hare  |
karmaNAM  phalabhoktA cha phaladaH  karma kurvatAm  ||  13-15
niSheddhA duShTasattvasya hantA tvaM  tamasAM paraH  |
netre te bhAnushashinau  nAsikA cha samIraNaH  ||  13-16
vAchaH sarasvatI devI jihvA medhaH prakIrtitaH  |
dantAshcha parvatA  j~neyA  karNaH pAtAlagocharaH  || 13-17
lakShmIrvakShastu  vij~neyA  vAmo bAhustu shaMkaraH  |
skandashcha dakShiNo  bAhura~ngulyaH sAgarAH  smR^itAH ||  13-18
ambaraM  kukShirityuktaM  vivarANi  dishaH  smR^itAH  |
rodasI tava pAdau cha  keshA devAH  smR^itA hareH  |
lomAni yakShagandharvAH pishAchA rAkShasA vibho  ||  13-19
yAnyeva  vastujAtAni  |oke dR^iShTAni  mAdhava  |
tAni gAtreShu  pashyAmaH   puruShottama  te hare  ||  13-20
adho bhavantaM  bhagavandrakShyAmaH sakalAtmanA  |
bhavantamUrdhvaM  pashyAmo  bhavantamatha   pR^iShThataH  |
pArshvataH  puratashchaiva  bhavantaM vIkShya  nirvR^itAH  ||  13-21
tvamAdau kroDadaMShTrAgre adadhA gAM saparvatAM  |
yathAsthAnaM  pratiShTApya  hiraNyAkShaM  prajaghnivAn  ||  13-22
nArasiMhavapurbhUtvA  devamAnuShakaNTakam  |
daityendraM hatavAnviShNo rAjyaM dattvA  marutvate  || 13-23
jamadagnisuto bhUtvA  hatavAnpitR^ighAtakam  |
kArtavIryaM  mahAtmAnaM  sakalakShatrakaNTakam  ||  13-24
raghoranvayamApannastvameva jagatAM pate  |
gatvAbdau setunA  viShNo |a~NkAM  rAvaNapAlitAm  ||  13-25
rAvaNaM sasutaM hatvA  sAnujaM sabalaM prabho  |
niShkaNTakamimaM lokamakaroH puruShottama  ||  13-26
balervAmanatAM  gatvA  mahImAdAya  mAyayA  |
dattavAMstridashendrAya pAtAle taM vyadIdadhAH  ||  13-27
tattadrUpamupAgamya  lokAnrakShasi  mAdhava  |
idAnImapi  devesha  devadeva  yadoH kule  ||  13-28
avatIrya hare viShNo  devapakShavirodhinaH  |
gopAlaveShamAsthAya  kR^iShNo.asi  shubhaveShavAn  |
pralambaM keshinaM hatvA hanta  kaMsasya mAdhava  ||  13-29
aho ramyamidaM   viShNo  vapurnIlotpalachChavi  |
nIlaku~nchitakeshADyamunnidrakamalekShaNam  |
vanamAlAkR^itoraskaM  rajjuyaj~nopavItinam  ||  13-30
shikyAlambighaTIkakShaM  karIShaprokShitodaram  |
kiMkiNIjAlasaMChannakaTishobhi prabhAmayam  ||  13-31
dAmakIlasamAsaktabhujadvayavibhUShitam  |
veNuvINAravaM kurvanparNavAdyamanoharam  |
aho manoramaM  rUpaM  pashyAmastava  mAdhava  ||  13-32
gopAlAste  chiraM dhanyA  ye rUpamidamIdR^isham   |
pashyanti nityasho viShNo  namaste  puruShottama  ||  13-33
namaH kR^iShNavapurdhAtre  gopaveShavilAsine  |
achintyavibhave tubhyaM  sarvagAya namo namaH  ||  13-34
namaH sakalakalyANakalyANAya  namo namaH  |
namaH paramatattvAya  namaH paramayogine  ||  13-35
devadeva  jagadvAsa  sarvakAraNakAraNa  |
bhUyaH punarnamasyAmastava  yogapadaM hare  |
sAdhayAmo  namaste.astu  tIrthAya jagatAM pate  ||  13-36
ityuktvA  harimIsheshaM  tIrthAya munipuMgavau  |
jagmatustatra  bhANDIre  sthitau tau   rAmakeshavau  |
chikrIDaturyathAyogaM  sagopau  rAmakeshavau  ||  13-37


December 13, 2008