harivaMsha, Volume II, Appendix 1, pp.199-203, BORI 1971 itranslated by A. Purushothaman, purushothaman_avaroth @ yahoo.com 25 narakAsureNa devAnAM parAjayaH 25a (pp. 199-202) chaturmukhAllabdhavaro babAdhe surasattamAn | sa jAtu vismayaM kurvandishAM dAnavasattamaH || 25a-1 anekashatasAhasrairdAnavaishcha samanvitaH | devalokaM jagAmAshu kurvansiMhadhvanIM muhuH || 25a-2 indrasya sadanaM gatvA kavATaM ghaTTayandanuH | yudhyatAmiti hovAcha jayo vA pratidIyatAM || 25a-3 tachChrutvA devarAjo.api devaiH sarvaiH samanvitaH | airAvataM samAruhya devasainyaishcha pA|itaH || 25a-4 yuddhAya dAnavendreNa narakeNa mahAtmanA | nirjagAma purAttasmAddAnavAnAM samIpataH | airAvataM samAsthAya tasthou tatra shachIpatiH || 25a-5 tato yuddhaM samabhavaddAnavAnAM durAtmanAm | devaiH shakrasahAyaishcha nighratAmitaretaram || 25a-6 devAH sharaiH samAjaghnurdAnavAnnagasaMnibhAn | dAnavAshcha mahArAja devAnindrapurogamAn | nijaghnuH samare tatra khaDgaiH prAsaiH parashvadhaiH || 25a-7 siMhanAdaM mahachchakrurdaityA yudhi mahAba|AH | devAnbabAdhire te tu pratyakShaM cha shachIpateH || 25a-8 ArtA yuddhaparishrAntA devAgachChandisho dasha | shakreNa vAritAshchApi sthAtuM shaktA na devatAH || 25a-9 tAMstu vidrAvitAndR^iShtvA vR^itrahA balasUdanaH | sthAtavyamiti hovAcha nirjarAnsa mahAprabhuH || 25a-10 dhanurAdAya vidhivajjayAghoShaM samavAsR^ijat | tataH sharasahasrANi mumocha yudhi vAsavaH || 25a-11 lokapAlAstathA rAjansamAjagmuH samantataH | yakShaishcha guhyakaishchaiva saha vaishravaNastathA || 25a-12 varuNo yAdasAM rAjA vAruNaishcha samanvitAH | nAgaishcha shatasAhasrairanuyAto digIshvaraH || 25a-13 yamo.api rAjA rAjendra kAlamR^ityusamanvitaH | yayau yoddhuM mahArAja narakaM dAnavottamam || 25a-14 taiH sArdhaM devarAjo.api yuddhaM chakre mahAmatiH | narako.api mahArAja yuddhaM chakre sudAruNam || 25a-15 hayagrIvo nisumbhashcha murashcha ripumardanaH | chakruryuddhaM mahAghoraM narakeNa saha prabho | lokapAlA mahArAja saMsaktA yoddhumIhate || 25a-16 hayagrIvo mahArAja varuNena samAgataH | chakre yuddhaM mahAghoraM yathA vR^itravadhe purA || 25a-17 nisumbho daNDahastena yamena saha saMgataH | muro.api rAjan vikrAnto rAjarAjena saMgataH || 25a-18 narako.api mahArAja devarAjena saMgataH | te cha devA mahArAja dAnavaiH saha saMgatAH || 25a-19 te devA dAnavAshchaiva parasparajayaiShiNaH | yuddhaM chakrurmahAghoraM prAsashaktyR^iShTitomaraiH || 25a-20 hayagrIvaM mahArAja varuNo yAdasAM patiH | jaghAna nishitairbANairmarmabhedibhirAshugaiH || 25a-21 varuNaM lokapAleshaM yAdavo nagasaMnibhaH | paraHshataiH sharANAM tu vivyAdha yudhi dAnavaH || 25a-22 sharANAM cha sahasrANi tatra devapatI raNe | mumocha yudhi pAsheshastamasyantaM shitA~nsharAn || 25a-23 punaH kruddho mahArAja dAnavo nagasaMnibhaH | varuNasya mahachchApaM muShTideshe baba~nja ha | kShurapreNa sutIkShNena devarAjasya pashyataH || 25a-24 visR^ijya sasharaM chApam pAshamAdAya pAshabhR^it | samAjagne sa pAshena hayagrIvaM mahAbalam || 25a-25 tamApatantaM vegena pAshaM jagrAha dAnavaH | tenaiva taM samAjaghne varuNaM yAdasAM patiM | sa tu pAsho.atra nirvIryaH svAminaM na babAdha ha || 25a-26 tataH kruddho hayagrIvo varuNaM yAdasAM patim | jaghAna gadayA rAjanmUrdhni deshe mahAbalam || 25a-27 sa tenAbhihato mUrdhni vama~nshoNitamulbaNam | visaMj~no.atha jagAmAshu tasmAtsaMgrAmadustarAt | vAruNaistaiH samAyuktoH nirjito dAnavaottamaiH || 25a-28 nisumbhaH pa~nchaviMshatyA yamaM jaghne mahAba|aH | yamo.api danurAdAya shareNa nataparvaNA | jaghAna dAnavaM saMkhye pashyatastu shachIpateH | nisumbho roShatAmrAkSho dhanushchichCheda tasya tat || 25a-29 utsR^ijya dhanuratnaM cha daNDamudyamya dAnavam | dhAvati sma yamo rAjanhantukAmo mahAbalaH || 25a-30 utsR^ijya tu mahArAja dAnavo dhanuruttamam | AdAya nishitaM khaDgaM prAyAtpretapatiM tadA || 25a-31 tayostAbhyAM mahAyuddhamAyudhAbhyAM tadAbhavat | purA devAsure yuddhe balivAsavayoriva || 25a-32 daNDenAbhyahananmUrdhni nisumbhasya durAtmanaH | Ahato daNDadhAreNa yamena sumahAtmanA || 25a-33 kiMchidAyastanayano nisumbho dAnavottamaH | khaDgena prAharattaM tu yamaM vaivasvataM yudhi || 25a-34 saMChinnavarmA devesho yamo yAmyaiH samanvitaH | visaMj~nedriyabhUtAtmA niHshvasanprANasaMshaye | jagAmAshu puraM yuddhAdbhIto dAnavasattamAt || 25a-35 rAjarAjastathA sArdhaM guhyakairdevasaMnibhaiH | yakShairvidyAdharaiH sArdhaM mANibhadrapurogamaiH || 25a-36 muraM tu mauravaiH sArdhaM samAjaghne paraH shataiH | sharANAM shitadhArANAM rAjarAjo mahAmatiH || 25a-37 muraH saptatisAhasrairmauravairyuddhakovidaiH | jaghAna rAjarAjaM tu sharaiH sunishitairapi | vidhvA tu rAjarAjaM taM guhyakAMshcha samAhanat || 25a-38 khaDgaiH pAshaiH samAjaghne yakShAndevaripustadA | yakShAshcha guhyakAshchaiva bhItA dudruvarAhavAt | parityajyAyudhaM mukhyaM mAnibhadrapurogamAH || 25a-39 yakShasainyaM parAjitya muro vaishravaNaM tadA | sharairAshiviShAkArairvivyAdha yudhi dAnavaH || 25a-40 stanayorvakShasi tathA chakShuShornetrasaMpuTe | yatheShTaM dharShayAmAsa dAnavo yuddhadurmadaH | sa chApyArto viShaNNashcha nirjagAma raNAjirAt || 25a-41 te cha yakShAstadA rAjanguhyakAshcha samantataH | alakAM cha samAjagmurbhItA yuddhaparA~NmukhAH || 25a-42 yamo.atha varuNashchaiva kuberashcha mahamatiH | nirjitA dAnavendreNa svaM svaM nagaramAyayuH || 25a-43 devAshcha nirjitAH sarve dAnavairnagasaMnibhaiH | disho dasha drutAH sarve bhItA vR^ittavilochanAH || 25a-44 December 15, 2008 25b (pp. 202-203) vaishaMpAyana uvAcha nirjitaM svabalaM dR^iShTvA devarAjaH shachIpatiH | AruhyairAvataM nAgaM prAMshuM shashinibhaM tadA II 25b-1 mAhendramatha chApaM cha sajyaM kR^itvA sudAruNam | chakre yuddhaM mahAghoraM narakeNa durAtmanA | 25b-2 narako.api mahArAja shakraM dR^iShTvA shachIpatiM | nanAda vividhaM nAdaM siMho gajapatiM yathA II 25b-3 AgachCheti tadovAcha jyAghoShaM cha chakAra SaH | tayoH samabhavadyuddhaM yathA vR^itravadhe purA II 25b-4 AdAya nishitaM bANaM narako duShTachetanaH | AkarNapUrNaM saMdhAya jaghne vR^itraripuM punaH II 25b-5 Ahatastena devendro vihvalaH samapadyataH | susrAva rudhiraM shakro gatasaMj~nastadAbhavat II 25b-6 samAshvastastadA shakraH sharairvivyAdha chAShTabhiH | rathaM vivyAdha saptatyA sArathiM navabhiH sharaiH II 25b-7 kShurapreNa tadA rAjandhvajaM chichCheda chottamaM | sArathiM prAhiNottasya yamAya nishitaiH sharaiH II 25b-8 jaghAnAshvAMshchaturbhistu bANaiH sunishitairapi | dhanushchichCheda bhallena narakasya durAtmanaH II 25b-9 sa chChinnadhanvA viratho vibANo hastasArathiH | AdAya nishitaM khaDgamutpatAta shachIpatim | AruhyairAvataM kuMbhe devarAjamapothayat II 25b-10 vyAvidhya tu punardaityo devarAjasya vakShasi | khaDgena pothayAmAsa devagandharvasaMsadi II 25b-11 visaMj~no vihvalashchaiva devarAjaH shatakratuH | utsR^ijyairAvataM nAgaM gachChati sma tadArtavat II 25b-12 nAgaM taM pothayAmAsa kumbhadeshe sa dAnavaH | sa cha nAgo mahArAja prAdravachcha bhayAttadA II 25b-13 jitvAtha narako bhaumo vR^itrahantAramAhave | nanAda vividAnnAdAnrodasI cha vinAdayan II 25b-14 nirjityAkhaNDalaM shakraM lokapAlAMstathaiva cha | jayamAghoShayAmAsa narako dAnavottamaH II 25b-15 amarAvatiM tadA daityaH pravishya cha mahAsuraiH | urvashIM cha samAhUya vachanaM chedamabravIt II 25b-16 bhaja mAmiha vAmorU nirjitaH shakra Ahave | ahamindro yamo rAjA varuNo yAdasAM patiH | ahameva sadA bhadre rAjarAjo.asmi suprabhe || 25b-17 urvashyuvAcha R^iShayo yadi te rAjanyakShyanti kratubhiH sadA | tadA bhajAmi daityendra nAtra kAryA vichAraNA | evamuktastadA daityo bADhamityabravIdvachaH II 25b-18 svargashreNIrmahArAja pramathya ditijaiH saha | svargadrumAnsamAdAya devakanyAstathAparAH II 25b-19 aShTau rAjansahasrANi gR^ihItvA dAnavottamaH | jagAma daityarAjastu yatheShTaM dAnavaiH saha II 25b-20 December 15, 2008