##Harivamsha Maha Puranam - ViShNu Parva - Chapter 10 - Description of the Rainy Season Itranslated and proofread by K S Rmachandran ramachandran_ksr @ yahoo.ca, March 26, 2008## Further proof-read by Gilles Schaufelberger schaufel @ wanadoo.fr If you find any errors compared to Chitrashala Press edn, send corrections to A. Harindranath harindranath_a @ yahoo.com ---------------------------------------------------------------- atha dashamo.adhyAyaH prAvR^iDvarNanam vaishaMpAyana uvAcha tau tu vR^indAvanaM prAptau vasudevasutAvubhau | cheraturvatsayUthAni chArayantau surUpiNau ||2-10-1 pUrNastu gharmasamayastayostatra vane sukham | krIDatoH saha gopAlairyamunAM chAvagAhatoH ||2-10-2 tataH prAvR^iDanuprAptA manasaH kAmadIpinI | pravavarShurmahAmeghAH shakrachApA~NkitodarAH ||2-10-3 babhUvAdarshanaH sUryo bhUmishchAdarshanA tR^iNaiH | patatA meghavAtena navatoyAnukarShiNA ||2-10-4 saMmArjitatalA bhUmiryauvanastheva lakShyate ||2-10-5 na vavarShAvasiktAni shakragopakulAni cha | naShTadAvAgnidhUmAni vanAni prachakAshire ||2-10-6 nR^ityavyApArakAlashcha mayUrANAM kalApinAm | madaraktAH pravR^ittAshcha kekAH paTuravAstathA ||2-10-7 navaprAvR^iShi kAntANAM ShaTpadAhAradAyinAm | yauvanasthakadambAnAM navAbhrairbhrAjate vapuH ||2-10-8 hAsitaM kuTajairvR^ikShaiH kadambairvAsitaM vanam | nAshitaM jaladairuShNaM toShitA vasudhA jalaiH | saMtaptA bhAskarakarairabhitaptA davAgnibhiH ||2-10-9 jalairbalAhakotsR^iShTairuchChvasantIva parvatAH | mahAvAtasamudbhUtaM mahAmeghagaNArpitam | mahI mahArAja puraistulyamApadyate nabhaH ||2-10-10 kvachitkadambahAsADhyaM shilIndhrAbharaNaM kvachit | saMpradIptamivAbhAti phullanIpadrumaM vanam ||2-10-11 aindreNa payasA siktaM mArutena cha vistR^itam | pArthivaM gandhamAghrAya lokaH kShubhitamAnasaH ||2-10-12 dR^iptasAra~NganAdena darduravyAhatena cha | navaishcha shikhivikruShTairavakIrNA vasundharA ||2-10-13 bhramattUrNamahAvartA varShaprAptamahArayAH | harantyastIrajAnvR^ikShAnvistAraM yAMti nimnagAH ||2-10-14 santatAsAraniryatnAH klinnayatnottarachChadAH | na tyajanti nagAgrANi shrAntA iva patatriNaH ||2-10-15 toyagambhIralambeShu sravatsu cha nadatsu cha | udareShu navAbhrANAM majjatIva divAkaraH ||2-10-16 mahIruhairutpatitaiH salilotpIDasa~NkulA | anviShyamArgA vasudhA bhAti shAdvalamAlinI ||2-10-17 vajreNevAvarugNAnAM nagAnAM nagashAlinAm | srotobhiH parikR^ittAni patanti shikharANyadhaH ||2-10-18 patatA meghavarSheNa yathA nimnAnusAriNA | palvalotkIrNamuktena pUryante vanarAjayaH ||2-10-19 hastochChritamukhA vanyA meghanAdAnusAriNaH | bhrAntAtivR^iShTyA mAta~NgA gAM gatA iva toyadAH ||2-10-20 prAvR^iTpravR^ittiM saMdR^ishya dR^iShTvA chAmbudharAnghanAn | rauhiNeyo mithaH kAle kR^iShNaM vachanamabravIt ||2-10-21 pashya kR^iShNa ghanAnkR^iShNAnbalAkojjvalabhUShaNAn | gagane tava gAtrasya varNachorAnsamuchChritAn ||2-10-22 tava nidrAkaraH kAlastava gAtropamaM nabhaH | tvamivAj~nAtavasatiM chandro vasati vArShikIm ||2-10-23 etannIlAmbudashyAmaM nIlotpaladalaprabham | saMprApte durdine kAle durdinaM bhAti vai nabhaH ||2-10-24 pashya kR^iShNa jalodagraiH kR^iShNairudgrathitairghanaiH | govardhano yathA ramyo bhAti govardhano giriH ||2-10-25 patitenAmbhasA hyete samantAnmadadarpitAH | bhrAjante kR^iShNasAra~NgAH kAnaneShu mudAnvitAH ||2-10-26 eAanyambuprahR^iShTAni haritAni mR^idUni cha | tR^iNAni shatapatrAkSha patrairgUhanti medinIm ||2-10-27 kSharajjalAnAM shailAnAM vanAnAM jaladAgame | sasasyANAM cha sImAnAM na lakShmIrvyatirichyate ||2-10-28 shIghravAtasamudbhUtAH proShitautsukyakAriNaH | dAmodaroddAmaravAH prAgalbhyaM yAnti toydAH ||2-10-29 hare haryashvachApena trivarNena trivikrama | vibANajyena rachitaM tavedaM madhyamaM padam ||2-10-30 nabhasyeSha nabhashchakShurna bhAtyeva charannabhaH | meShaiH shItAtapakaro virashmiriva rashmivAn ||2-10-31 dyAvApR^ithivyoH saMsargaH satataM vitataiH kR^itaH | avyavachChinnadhAraughaiH samudraughasamairghanaiH ||2-10-32 nIpArjunakadambAnAM pR^ithivyAM chAtivR^iShTibhiH | gandhaiH kolAhalA vAnti vAtA madanadIpanAH ||2-10-33 saMpravR^ittamahAvarShaM lambamAnamahAMbudam | bhAtyagAdhamaparyantaM sasAgaramivAmbaram ||2-10-34. dhArAnirmalanArAchaM vidyutkavachavarmiNam | shakrachApAyudhadharaM yuddhasajjamivAMbaram ||2-10-35 shailAnAM cha vanAnAM cha drumANAM cha varAnanam | pratichChannAni bhAsante shikharANi ghanairghanaiH ||2-10-36 gajAnIkairivAkIrNaM salilodgAribhirghanaiH | varNasArUpyatAM yAti gaganaM sAgarasya cha ||2-10-37 samudroddhUtajanitA lolashADvalakampinaH | shItAH sapR^iShatoddAmAH karkashA vAnti mArutAH ||2-10-38 nishAsu suptachandrAsu muktatoyAsu toyadaiH | magnasUryasya nabhaso na vibhAnti disho dasha ||2-10-39 chetanaM puShkaraM koshaiH kShudhAdhmAtaiH samantataH | na ghR^iNInAM na ramyANAm vivekaM yaMti kR^iShTayah |2-10-40 gharmadoShaparityaktaM meghatoyavibhUShitam | pashya vR^indAvanaM kR^iShNa vanaM chaitrarathaM yathA ||2-10-41 evaM prAvR^iDguNAnsarvA~nChrImAnkR^iShnasya pUrvajaH | kathayanneva balavAnvrajameva jagAma ha ||2-10-42 anyonyaM ramamANau tu kR^iShNasa~NkarShaNAvubhau | tatkAlaj~nAtibhiH sArddhaM cheratustadvanaM mahat ||2-10-43 iti shrImahAbhArate khileShu harivAMshe viShNuparvaNi prAvR^iDvarNane dashamo.adhyAyaH