# Harivamsa Maha Puranam - Part 2 - Vishnu Parva Chapter 32 - Coronation of Ugrasena Itranslated by K S Ramachandran ramachandran_ksr@yahoo.ca, July 5, 2008 Note: there is some confusion in the text in numbering of verses from 47 to 53## Further proof-read by Gilles Schaufelberger schaufel @ wanadoo.fr If you find any errors compared to Chitrashala Press edn, send corrections to A. Harindranath harindranath_a @ yahoo.com ---------------------------------------------------------------- atha dvAtriMsho.adhyAyaH ugrasenAbhiShekaH vaishampAyana uvAcha ugrasenastu kR^iShNasya samIpaM duHkhito yayau | putrashokAbhisaMtapto viShapIta iva shvasan ||2-32-1 sa dadarsha gR^ihe kR^iShNaM yAdavaiH parivAritam | pashchAnutApAddhyAyantaM kaMsasya nidhanAvilam ||2-32-2 kaMsanArIvilApAMshcha shrutvA sa karuNAnbahUn | garhamANastathAtmAnaM tasminyAdavasaMsadi ||2-32-3 aho mayAtibAlyena roShAddoShAnuvartinA | vaidhavyaM strIsahasrANAM kaMsasyAsya vadhe kR^itam ||2-32-4 kAruNyaM khalu nArIShu prAkR^itasyApi jAyate | evamArtaM rudantIShu mayA bhartari pAtite ||2-32-5 paridevitamatreNa shokaH khalu vidhIyate | kR^itAntasyAnabhij~nAnAM strINAM kAruNyasaMbhavaH ||2-32-6 kaMsasya hi vadhaH shreyAnprAgevAbhimato mama | satAmudvejanIyasya pApeShvabhiratasya cha ||2-32-7 loke patitavrR^ittasya paruShasyAlpamedhasaH | akliShTaM maraNaM shreyo na vidviShTasya jIvitam ||2-32-8 kaMsaH pApaparashchaiva sAdhUnAmapyasaMmataH | dhikChabdapatitashchaiva jIvite chAsya kA dayA ||2-32-9 svarge tapobhR^itAM vAsaH phalaM puNyasya karmaNaH | ihApi yashasA yuktaH svargasthairavadhAryate ||2-32-10 yadi syurnirvR^itA lokAH syushcha dharmaparAH prajAH | narA dharmapravR^ittAshcha na rAj~nAmanayaH spR^ishet ||2-32-11 nigrahe duShTavR^ittInAM kR^itAntaH kurute phalam | iShTadharmeShu lokeShu kartavyaM pAralaukikam ||2-32-12 atIva devA rakShanti naraM dharmaparAyaNam | kartAraH sulabhA loke duShkR^itasya hi karmaNaH ||2-32-13 hataH so.ayaM mayA kaMsaH sAdhvetadavagamyatAm | mUlachChedaH kR^itastasya viparItasya karmaNaH ||2-32-14 tadeSha sAntvyatAM sarvaH shokArtaH pramadAjanaH | paurAshcha puryAM shreNyashcha sAntvyantAM sarva eva hi ||2-32-15 evaM bruvati govinde viveshAvanatAnanaH | ugraseno yadUngR^ihya putrakilbiShasha~NkitaH ||2-32-16 sa kR^iShNaM puNDarIkAkShamuvAcha yadusaMsadi | bAShpasaMdigdhayA vAchA dInayA sajjamAnayA ||2-32-17 putro niryApitaH krodhAnnIto yAmyAM dishaM ripuH | svadharmAdhigatA kIrtirnAma vishrAvitaM bhuvi ||2-32-18 sthApitaM satsu mAhAtmyaM sha~NkitA ripavaH kR^itAH | sthApito yAdavo vaMsho garvitAH suhR^idaH kR^itAH ||2-32-19 sAmanteShu narendreShu pratApaste prakAshitaH | mitrANi tvAM bhajiShyanti saMshrayiShyanti pArthivAH ||2-32-20 prakR^itayo.anuyAsyanti stoShyanti tvAM dvijAtayaH | saMdhivigrahamukhyAstvAM praNamiShyanti mantriNaH ||2-32-21 hastyashvarathasaMpUrNaM padAtigaNasa~Nkulam | pratigR^ihANa kR^iShNedaM kaMsasya balamavyayam ||2-32-22 dhanaM dhAnyaM cha yatki~nchidratnAnyAchChAdanAni cha | pratIchChantu niyuktA vai tvadIyAH kR^iShNa pUruShAH ||2-32-23 striyo hiraNyaM yAnAni yadanyadvasu ki~nchana | evaM hi vihite yoge paryApte kR^iShNa vigrahe ||2-32-24 pratiShThitAyAM medinyAM yadUnAM shatrusUdana | tvaM gatishchAgatishchaiva yadUnAM yadunandana ||3-32-25 shR^iNuShva vadatAM vIra kR^ipaNAnAmidaM vachaH | asya tvatkopadagdhasya kaMsasyAshubhakarmaNaH ||2-32-26 tava prasAdAdgovinda pretakAryaM kriyeta ha | tasya kR^itvA narendrasya vipannasyaurdhvadehikam ||2-32-27 sasnuSho.ahaM sabhAryashcha chariShyAmi mR^igaiH saha | pretasatkAramAtreNa kR^ite bAndhavakarmaNi ||2-32-28 AnR^iNyaM laukikaM kR^iShNa gatAH kila bhavanti hi | tasyAgniM pashchimaM kR^itvA chitisthAne vidhAnataH | toyapradAnamAtreNa kaMsasyAnR^iNyamApnuyAm ||2-32-29 etatte kR^iShNa vij~nApyaM sneho.atra mayi yujyatAm | prApnoti sugatiM tatra kR^ipaNaH pashchimAM kriyAm ||2-32-30 etachChrutvA vachastasya kR^iShNaH paramavismitaH | pratyuvAchograsenaM vai sAntvapUrvamidaM vachaH ||2-32-31 kAlayuktAmidaM tAta tavatadyatprabhAShitam | sadR^ishaM rAjashArdUla vR^ittasya cha kulasya cha ||2-32-32 yattvamevaMvidho brUShe gate.arthe duratikrame | prApsyate nR^ipasatkAraM kaMsaH pretagato.api san ||2-32-33 kule mahati te janma vedAnviditavAnasi | kathaM na j~nAyate tAta niyatirduratikramA ||2-32-34 sthAvarANAM cha bhUtAnAM ja~NgamAnAM cha pArthiva | pUrvajanmakR^itaM karma kAlena paripachyate ||2-32-35 shrutavanto.arthavantashcha dAtAraH priyadarshanAH | brahmaNyA nayasaMpannA dInAnugrahakAriNaH ||2-32-36 lokapAlasamAstAta mahendrasamavikramAH | kShitipAlAH kR^itAntena nIyante nR^ipasattama ||2-32-37 dhArmikAH sarvabhAvaj~nAH prajApAlanatatparAH | kShatradhamaparA dAntAH kAlena nidhanaM gatAH ||2-32-38 svayamAtmakR^itaM karma shubhaM vA yadi vAshubham | prApte kAle tu tatkarma dR^ishyate sarvadehinAm ||2-32-39 eShA hyantarhitA mAyA durvij~neyA surairapi | yathAyaM muhyate loko hyatra karmaiva kAraNam ||2-32-40 kAlenAbhihataH kaMsaH pUrvakarmaprachoditaH | na hyahaM kAraNaM tatra kAlaH karma cha kAraNam ||2-32-41 sUryasomamayaM tAta kR^itsnaM sthAvaraja~Ngamam | kAlena nidhanam gatvA kAlenaiva cha jAyate ||2-32-42 sa kAlaH sarvabhUtAnAM nigrahAnugrahe rataH | tasmAtsarvANi bhUtAni kalasya vashagAni vai ||2-32-43 svadoSheNaiva dagdhasya sUnostava narAdhipa | nAhaM vai kAraNaM tatra kAlastatra cha kAraNam ||2-32-44 atha vAhaM bhaviShyAmi kAraNaM nAtra saMshayaH | parAyaNaparaH kAlaH kiM kariShyatyakAraNaH ||2-32-45 kAlastu balavAnrAjandurvij~neyA hi sA gatiH | parAvaravisheshaj~nA yAM yAnti samadarshinaH ||2-32-46 gatiH kAlasya sA yena sarvaM kAlasya gocharam | bravImi yadahaM tAta tadanuShThIyatAM vachaH ||2-32-47 na hi rAjyena me kAryaM nApyahaM nR^ipa kA~NkShitaH | na chApi rAjyalubdhena mayA kaMso nipAtitaH ||2-32-48 kiM tu lokahitArthAya kIrtyarthaM cha sutastava | vya~NgabhUtaH kulasyAsya sAnujo vinipAtitaH ||2-32-49 ahaM sa eva gomadhye gopaiH saha vanecharaH | prItimAnvichariShyAmi kAmachArI yathA gajaH |2-32-50 etAvachChatasho.apyevaM satyenaitadbravImite | na me kAryaM nR^ipatvena vij~nApyaM kriyatAmidam ||2-32-51 bhavAnrAjAstu mAnyo me yadUnAmagraNIH prabhuH | vijayAyAbhiShichyasva svarAjye nR^ipasattama ||2-32-52 yadi te matpriyaM kAryaM yadi vA nAsti te vyathA | mayA nisR^iShTaM rAjyaM svaM chirAya pratigR^ihyatAm ||2-32-53 vaishampAyana uvAcha etachChrutvA tu vachanaM nottaraM pratyabhAShata | vrIDitAdhomukhaM taM tu rAjAnaM yadusaMsadi ||2-32-54 abhiShekena govindo yojayAmAsa dharmavit | sa baddhamukuTaH shrImAnugraseno mahAdyutiH | chakAra saha kR^iShNena kaMsasya nidhanakriyAm ||2-32-55 taM sarve yAdavA mukhyA rAjAnaM kR^iShNashAsanAt | anujagmuH purImArge devA iva shatakratum ||2-32-56 rajanyAm tu nivR^ittAyAM tataH sUrye virAjite | pashchimaM kaMsasaMskAraM chakruste yadupu~NgavAH ||2-32-57 shibikAyAmathAropya kaMsadehaM yathAkramam | naiShThikena vidhAnena chakruste kaMsasatkriyAm ||2-32-58 sa nIto yamunAtIramuttamaM nR^ipateH sutaH | satkR^itashcha yathAnyAyaM naidhanena chitAgninA ||2-32-59 tathaiva bhrAtaraM chAsya sunAmAnaM mahAbhujam | samskAraM lambhayAmAsuH saha kR^iShNena yAdavAH ||2-32-60 tAbhyAM te salilaM chakrurvR^iShNyandhakapurogamAH | akShayaM chAStu pretebhyo bhAShamANAH punaH punaH ||2-32-61 hiraNyasya suvarNasya dashakoTIstathA hariH | gAvo ratnAni vAsAMsi grAmAnnagarasaMmatAn ||2-32-62 dadau kaMsaM samuddishya brAhmaNebhyo nR^ipottamaH | akShayaM chApi viprebhyo bhAShamANAH punaH punaH ||2-32-63 tayoste salilaM dattvA yAdavA dInamAnasAH | puraskR^ityograsenaM vai vivishurmathurAM purIm || 2-32-64 iti shrImahAbhArate khileShu harivaMshe viShNuparvaNi ugrasenAbhiShekakaMsasaMskArakathane dvAtriMsho.adhyAyaH